WhatsApp abre as portas aos adhesivos animados

As versións de proba de WhatsApp xa están a recibir novidades que nos vindeiros días pasarán a ser oficiais, e supoñen cambios moi visuais para a aplicación de mensaxería instantánea, sendo probablemente a máis salientable a incorporación de adhesivos animados, estando xa dispoñible o primeiro lote de stickers animados, axudando así a que os usuarios poidan ter comunicacións máis expresivas.
Outra funcionalidade interesante, pero que tardará en conseguir tracción ante a falta de hábito dos usuarios, é o uso de códigos QR para intercambiar contactos, de xeito que cando coñezamos a alguén e queiramos introducir o seu número na nosa axenda de contactos, chegará con empregar WhatsApp para captar un código na pantalla do teléfono do que queremos rexistrar o seu número, axilizando así a operación e evitando os posibles erros dunha introdución manual.
Nos escritorios informáticos, que poden acceder a WhatsApp a través dunha aplicación ou dunha interface web, teñen agora tamén dispoñible o modo escuro que leva uns meses dispoñible no móbil, conseguindo así unha experiencia máis uniforme.
As videoconferencias en grupo con até 8 participantes tamén reciben unha novidade moi curiosa, que consiste en que, cando premamos de xeito prolongado sobre unha das persoas na conversa en vídeo a súa imaxe maximizarase, para poder centrar a atención nun participante en concreto. Tamén axilizan as videoconferencias grupais incorporando unha icona de vídeo nos chats de grupo que conten con 8 participantes ou menos.
A última novidade en chegar nos vindeiros días a WhatsApp sería que os usuarios de móbiles con KaiOS contarán por fin cos estados que permiten compartirse durante 24 horas.