Volven a Oleiros, Santiago, A Coruña e Vigo os Digital Transformation Days do ICOIIG
mércores, 23 de outubro do 2019
O
Colexio Oficial de Enxeñeiros
Industriais de Galicia (ICOIIG) celebrou este martes 22 pola
mañá, no centro de coworking Pazo de Arezana de Oleiros
(Deputación da Coruña), unha nova edición das súas xornadas
Digital Transformation Day. A actividade adicouse a profundar
nas tecnoloxías implicadas na transformación dixital e o
funcionamento da Industria 4.0. O primeiro relator en intervir foi
Pablo Pérez, director de xestión do ICOIIG, quen expuxo o papel do
ser humano no proceso de transformación dixital. A continuación,
Marcelo Toural, enxeñeiro industrial que traballa como CEO
(director executivo) en Krack Zapaterías, falou das principais
características da cadea de valor 4.0.
Finalmente,
Daniel Prieto, doutor en Enxeñaría Industrial e CEO en Soltec,
expuxo como a transformación dixital implica un punto de inflexión
(un modelo de disrupción) fronte á evolución convencional,
ademais de detallar en que consiste a tecnoloxía de Xemelgos
Dixitais (Dixital Twins) para a simulación e análise
de procesos industriais.
Esta
xornada, con idénticos contidos, repítese hoxe na delegación do
ICOIIG en Santiago de Compostela, o vindeiro martes 29 na delegación
do ICOIIG na Coruña, e ao día seguinte, mércores 30, na delegación
de Vigo. Neste tres casos desenvolverase en horario de tarde, desde
as 16:30 até as 21:00 horas. A asistencia é gratuíta e as
inscricións pódense formalizar na páxina web www.icoiig.es.
Con
esta iniciativa de divulgación formativa, o ICOIIG, a través da súa
Oficina de Transformación Dixital, busca “situar ao enxeñeiro
industrial como profesional de referencia para afrontar a
transformación dixital das empresas e optimizar a súa aplicación
contribuíndo á mellora da conta de resultados”.
120
accións
As actividades destes días enmárcanse nun
intenso calendario de 120 accións coas que o ICOIIG está a chegar
ás sete principais cidades galegas ao longo deste ano 2019. Todas
elas son de acceso libre e de balde para todas as empresas
interesadas.
Esta campaña divulgativa afonda en aspectos como
a forma de sacarlle proveito á realidade aumentada, as oportunidades
da impresión 3D, as solucións que permite a análise da información
a gran escala (Big Data) o desenvolvemento da mercadotecnia
dixital, a Intelixencia Artificial, a robótica, a dixitalización
dos almacéns coa loxística 4.0, a aplicación da tecnoloxía
blockchain aos negocios, as contribucións do uso de drons
nas empresas ou a utilidade da ciberseguridade ante os riscos
dixitais.
As Oficinas
de Transformación Dixital postas en marcha en toda España polo
Ministerio de Economía e Empresa, a través da entidade pública
Red.es, contan cun orzamento global de cinco millóns de euros. As
actuacións a realizar serán financiadas con cargo ao Programa
Operativo Plurirrexional de España (POPE), Fondos Europeos de
Desenvolvemento Rexional (FEDER) do período de programación
2014-2020 e baixo a lema Unha maneira de facer Europa que
ten entre os seus obxectivos mellorar o uso, a calidade e o acceso ás
Tecnoloxías da Información e a Comunicación (TIC).
Esta
iniciativa execútase en paralelo ao Programa de Axudas Asesores
Dixitais, dotado con outro cinco millóns de euros a través do
mesmo tipo de Fondos Europeos e ten por obxectivo realizar plans de
dixitalización que axuden ás PEME a incorporar o TIC nos seus
procesos: xestión do negocio, relación con terceiros, comercio
electrónico e dixitalización de servizos ou solucións.