Vilalba impulsa un proxecto de infraestruturas ambientais e dixitais para reducir a contaminación
xoves, 11 de agosto do 2022
O
Concello
de Vilalba presentou os detalles dun proxecto de infraestruturas
ambientais e dixitais para dar unha viraxe ás zonas verdes e de
lecer: unha viraxe propia das Cidades Intelixentes e que pon o
foco na sustentabilidade. A iniciativa abranguerá varias varios
conxuntos arbóreos e rúas do centro urbano, que se someterán tamén
a traballos para favorecer a accesibilidade. O Concello fará fronte
á actuación cunha subvención de 500.000 euros ao Ministerio para a
Transición Ecolóxica e o Reto Demográfico. Esta achega permitiría
afrontar o 100% do investimento necesario na actuación.
En
concreto, a actuación acometeríase na rúa de Galicia e a súa
continuación na rúa Cidade de Lugo; avenida Terra Chá; rúa da
Feira; rúa Campo da Ponte; rúa Muras e a súa continuación coa
avenida de Cospeito; rúa Castelao e Camiño Campo Redondo, ata o
cruzamento co camiño das Rodas.
A
través deste proxecto dotarase de arboredo, espazos permeábeis e
zonas de descanso e calidade ambiental aos veciños de Vilalba.
Paralelamente, a actuación diríxese tamén a mellorar a
infiltración de pluviais; a resiliencia fronte ao cambio climático;
as capacidades de captación de carbono, a xestión das aguas
pluviais, e o conxunto da calidade urbana de Vilalba.
No
caso de realizarse a actuación, a xestión das novas plantacións
xerará postos de traballo e unha bagaxe dixital e específica de
“gran potencial”, en palabras do Concello, que engade que está
previsto incorporar Sistemas de Drenaxe Urbana Sustentábel (SUDs) e
as técnicas GIS para o inventariado e xestión das novas zonas
instaladas.
“O
proxecto aumenta a comodidade dos peóns e dos usuarios dos
estacionamentos; as zonas verdes, ademais da colocación de contornas
arbóreas que permitirán áreas de sombra e a redución da
contaminación, incorporando unha zona de estar que mellora a
accesibilidade das beirarrúas, permitindo o descanso das persoas con
mobilidade reducida e a convivencia entre os habitantes”, explicou
Luis Fernández, concelleiro de Infraestruturas de Vilalba.
O
proxecto afecta a un ámbito dun total de 87.000 m2 de viario urbano,
nos que se disporán un total de 118 conxuntos arbóreos.