Vilagarcía tramita de maneira electrónica o 95% dos seus expedientes
martes, 15 de maio do 2018
O
Concello de Vilagarcía vén de dar importantes avances en materia de
Administración Electrónica. Nun
plano máis concreto, conseguiu chegar a unha taxa do 95% en volume
de expedientes tramitados de maneira dixital. A esta porcentaxe,
de por si un fito importante, cómpre engadir os factores axilidade,
comodidade e seguridade. En palabras de Rosa Losada, secretaria
xeral do Concello, “implantar a Administración Electrónica no
noso concello permitiunos reducir o tempo medio de tramitación e así
responder máis rápido ás necesidades dos cidadáns”.
No
proceso de adaptación á Administración Electrónica traballaron
arreo o propio equipo de Goberno de Vilagarcía e os empregados
municipais, que colaboraron na implantación e posta en marcha da
Sede Electrónica local e do xestor de expedientes, que son parte da
solución integral de eAdministración que foi introducida,
desenvolvida e habilitada pola firma galega Imatia.
Segundo engade Rosa Losada a conto destes traballos, “Imatia
axudounos a mellorar moitos procesos que antes faciamos de forma
manual e sen compartir a información dispoñíbel, pero sobre todo
fíxose buscando en todo intre a colaboración dos empregados
públicos, de forma progresiva e adaptándose ás súas necesidades”.
A
solución adoptada polo Concello foi Cividas e-Gov, o xestor de
expedientes que xa estaba a funcionar con éxito nas áreas de
Rexistro e Urbanismo, estendendo o seu uso ao resto da administración
local. Segundo explican dende Imatia, a clave para logralo foi a
contratación, a comezos de 2017, dun servizo de dinamización para
os empregados públicos, nos que un experto en Cividas e-Gov e en
Administración Electrónica proporcionaría asistencia técnica
profesional e in situ. Entre
as características máis salientábeis da solución aplicada figura
a súa natureza modular, que permitiu evolucionar ao ritmo necesario,
dando especial importancia a lograr a aceptación dos usuarios.
Segundo engade a empresa TIC, a opción elixida saldárase
previamente con experiencias positivas noutros concellos galegos.
Amais
de axilizar tarefas entre os empregados públicos e fornecelos de
servizos como caixas de correo, un acubillo único de expedientes ou
o uso cotián da sinatura electrónica, púxose en marcha o
desenvolvemento da Sede Electrónica de Vilagarcía de Arousa. Nesta
web, os cidadáns teñen acceso a información sobre todos os
servizos dispoñíbeis no Concello, así como os requisitos e
formularios precisos para solicitalos, amais doutras funcionalidades,
como a posibilidade de consultar o estado dos seus expedientes ou
descargar documentos oficiais, como volantes de empadroamento.