Varias aventuras gráficas de Telltale súmanse a un Humble Bundle

A aventura gráfica de Regreso ao Futuro chega a un Humble Bundle semanal

Esta semana demos conta do oitavo lote de xogos independentes recompilados por The Humble Bundle, no que é un dos mellores paquetes comercializados ata o momento mediante esta fórmula na que o usuario decide a cantidade que paga polos xogos, deixando unha parte para a caridade, que en menos de dous días superou os 1,3 millóns de dólares recadados, pero esta promoción vixente durante dúas semanas ten unha oferta paralela dende a semana pasada, o The Humble Weekly Sale, que vén de renovarse cun lote moi atractivo no que ofértanse varios xogos de Telltale Games para Windows e OS X (neste último caso, só os xogos dispoñibles para Mac) que para quen pague máis de 1 dólar, aparte da súa descarga sen DRM, tamén poderá gozar dun código para o seu canxeo en Steam.
Os xogos que durante unha semana estarán de oferta son as aventuras gráficas Back to the Future: The Game (adaptación dos filmes de Regreso ao Futuro), Sam & Max: Devil’s Playhouse, Hector: Badge of Carnage!, Poker Night at the Inventory, Puzzle Agent 1 & 2 e Wallace & Gromit’s Grand Adventure, aos que sumarase un dos mellores xogos do ano pasado no caso de pagar unha cantidade superior á media (3,90 dólares no momento de escribir estas liñas), que non é outro que o galardoado The Walking Dead, que corresponde a unha primeira tempada dun xogo episódico inspirado na creación de Robert Kirkman. Unha oportunidade difícil de resistir para calquera afeccionado ás aventuras gráficas, especialmente se temos en conta que xogos como The Walking Dead e Back to the Future: The Game teñen prezos de 24,99 euros cada un, o que dá a entender que estamos ante unha ganga irrepetible.

Trailer da aventura gráfica de The Walking Dead