Urbaser introduce o factor smart na xestión de refugallos da man de Microsoft
martes, 4 de setembro do 2018
Urbaser,
empresa multinacional referente en xestión ambiental e con presenza
activa en múltiples concellos galegos, vén
de dar un paso importante en materia smart da man do xigante
Microsoft, máis en detalle da súa plataforma para a Internet das
Cousas, Azure IoT. Segundo nos contan a compañía tecnolóxica e
máis Urbaser, a aposta desta empresa polos obxectos conectados
responde ao seu interese por atopar “novos métodos de transformar
os refugallos en recursos”.
En
palabras de Manuel Andrés Martínez, director xeral de Servizos
Urbanos, “queremos ofrecer no futuro solucións integradas para os
problemas ambientais dentro do marco das Smart Cities e a
economía circular”.
Este
compromiso coas tecnoloxías máis innovadoras xa se deixa notar
dende hai un tempo, por exemplo na aplicación das TIC para
fortalecer os seus servizos dentro das distintas verticais do
concepto práctico de Cidade Intelixente, procurando eficiencia total
na nube e máxima operatividade. O proceso implicou a análise
pormenorizada de diferentes opcións de mercado para obter servizos
cloud, decantándose Urbaser por Microsoft Azure para a posta
en marcha da súa propia plataforma IoT. “As razóns desta decisión
son o amplo catálogo de servizos que ofrece e a flexibilidade da
arquitectura da súa plataforma”, explican dende Urbaser, que xa
está a executar a primeira versión da súa plataforma de Internet
das Cousas, que permite xestionar todos os seus activos: a frota de
vehículos, os procesos industriais levados a cabo nas súas plantas
de tratamento de residuos e auga, e os diferentes activos repartidos
na cidade, como os colectores.
A
folla de ruta de Urbaser en relación ao IoT (Internet of Things)
centrouse inicialmente nos seus servizos urbanos, especialmente na
recolección de refugallos e limpeza de rúas, onde se fixo posíbel
o seguimento total de vehículos e colectores, a través de sensores
conectados, permitindo a transmisión de información á plataforma
cloud de Microsoft Azure, e facendo posíbel a creación de
sistemas de información en tempo real. “Estes sistemas”, explica
o xigante informático, “son utilizados polos xestores dos servizos
urbanos para optimizar os recursos adicados a todas as tarefas,
maximizando o nivel de servizo á cidade, mellorando as rutas de
recolleita, reducindo o nivel de ruído e diminuíndo o consumo de
combustíbel e emisións de gas”.
Por
outra banda, a información en tempo real recibida dos vehículos
ofrece a posibilidade de detectar potenciais avarías e minimizar o
número de arranxos e interrupcións do servizo.