Unha enquisa reflicte un gran descontento ante o cambio de deseño de Facebook

luns, 23 de marzo do 2009 Marcus Fernández

PNG - 16.6 KB
Na enquisa o 94% dos usuarios non gustan do cambio de deseño de Facebook

Parece que o fracaso das negociacións de compra de Twitter por parte de Facebook levou á plataforma de redes sociais creada por Mark Zuckerberg a cambiar o seu deseño, actuación que parece tomada como reacción a un feito puntual e totalmente en contra dos gustos dos usuarios, que dende o primeiro momento non só critican a estética da reestruturación da páxina web, senón tamén a confusión que provoca o novo deseño, que dá excesiva importancia a certos elementos (coma o microblogging) deixando de lado outras actividades dos usuarios (que se acumulan de xeito confuso á dereita da pantalla).
Como dende Facebook non escoitaban as voces dos usuarios molestos polo cambio, activaron unha enquisa para votar positiva ou negativamente o novo deseño, e a realidade é teimuda, porque participaron máis dun millón de usuarios (a aplicación de máis rápido crecemento na historia de Facebook), estando o 94% dos mesmos en contra do cambio de deseño.
Queda en evidencia así o malestar dos usuarios ante a remodelación, pero o propio Mark Zuckerberg asegura que non hai que escoitar aos usuarios, porque eles poden non ter a razón. No seu favor podemos dicir que a enquisa realizada non é significativa, pois o normal é que se sumen a ela as persoas que están en contra do cambio de deseño, ou sexa, que serviría para asegurar que hai máis dun millón de usuarios de Facebook descontentos, pero Facebook ten máis de 175 millóns de usuarios, polo que resulta difícil coñecer o parecer da grande masa que non participou na consulta (aínda que parece razoable pensar que tamén estarán en contra dos cambios, aínda que sexa só atendendo aos moitos comentarios negativos que podemos ler na web).
O feito de que unha empresa de éxito na captación de usuarios (aínda non demostrou a súa viabilidade económica) nade contracorrente ignorando ao seu principal activo resultará digna de estudo, pois poderiamos estar ante unha táctica intelixente ou ante un dos maiores erros deste novo boom da Internet no que a web social cobra importancia ¿ignorando á sociedade?.

PUBLICIDADE