Unha batería externa adopta a forma da espada de luz de Darth Vader

Nos últimos meses non son poucos os modelos de baterías externas para cargar dispositivos por USB que chegaron ao mercado, pero un dos máis rechamantes é o que está a vender a tenda en liña Brando por 49,90 dólares (36,65 euros) por ser un produto con licencia oficial de Star Wars que adopta a forma da espada de luz de Darth Vader que incluso conta cunha luz LED de cor vermella para darlle aínda máis realismo á súa reprodución.
Estamos ante unha batería cunha capacidade de 2.800 mAh que mide 16 x 4,2 x 3,1 centímetros e recibe a carga a través dunha toma microUSB para entregar a enerxía por un porto USB de tamaño completo a 1,2 A (lembremos que dispositivos como o iPad precisan dun mínimo de 1 A para poder cargarse por USB). Integra 4 indicadores LED e un botón de acendido/apagado para controlar a carga.