Unayta dixitaliza as actas consistoriais do Concello de Pontevedra
xoves, 4 de abril do 2019
Unayta,
empresa de servizos TIC con sede en Milladoiro (Ames), vén de
realizar un relevante labor de dixitalización de documentos para o
Concello de Pontevedra. Neste
caso concreto, os traballos centráronse nas actas consistoriais que
están en posesión do Consistorio. Segundo informa Unayta, este
tipo de arquivos adoitan ter un gran potencial para coñecer a
historia e a evolución dunha vila ou unha cidade, e tamén as
persoas que traballaron na vida pública local. En concreto, a
empresa de Ames acometeu o tratamento das actas do Arquivo Municipal
de Pontevedra comprendidas entre o ano 1969 e o 2004.
Segundo
informa Unayta, o labor serviu non só para reivindicar unha parte da
historia da cidade e adaptar o seu coñecemento aos novos formatos e
metodoloxías, senón tamén para atopar documentos “verdadeiramente
interesantes”, precisamente por ser o período abordado un período
de relevantes acontecementos históricos, políticos, sociais e
económicos: a ditadura de Franco, a posterior transición até a
democracia, o asentamento da mesma nas décadas vindeiras, etc. Deste
xeito, os profesionais de Unayta atoparon respostas concretas sobre
como se viviron os devanditos cambios na cidade, sobre o que se falou
no pleno anterior á morte do ditador ou sobre cales eran os temas
que máis preocupaban á sociedade e aos seus representantes durante
o errado golpe de Estado do 1981.
O
proceso de recuperación e tratamento de arquivos arrincou con libros
de actas manuscritos: “Dixitalizalos é moi importante para que non
se perda o seu contido, xa que tanto a tinta como a humidade e o uso
dos mesmos libros poden afectar á súa conservación”. A
continuación abordouse o tratamento dos contidos mecanografados, que
xa son máis recentes. “Na actualidade os libros de actas son
dixitais polo que o acceso aos mesmos é máis rápido e directo”,
explican, engadindo que con este proxecto preténdese achegar,
conservar e facilitar o acceso á información que o cidadán
necesite sen necesidade de botar man dos libros físicos das actas do
Concello de Pontevedra.