Un xulgado solicita o "cesamento de emisións" de Rojadirecta
luns, 22 de xuño do 2015
Mediapro deu conta hoxe do feito de que o Xulgado Mercantil nº 11
de Madrid ordenou o peche inmediato das emisións ilegais de partidos da Liga de
Fútbol Profesional a través de da páxina web galega Rojadirecta.me
atendendo ás medidas cautelares solicitadas por Mediapro e Gol T, indicando
que, no caso de que os responsables non cesasen as emisións nun prazo de 7
días, a xuíz ordenará aos prestadores de servizo a “que suspendan a
transmisión, o aloxamento de datos, o acceso a redes de telecomunicación ou
calquera outro servizo equivalente”, e dicir, que tomarán medidas para impedir
a difusión da citada web.
Estas medidas cautelares formarían parte dun proceso xudicial contra
Rojadirecta.me e o seu principal promotor, Igor Seoane, por infracción de
dereitos de propiedade intelectual e competencia desleal, por considerar os
denunciantes que tal espazo na web non se limita a enlazar retransmisións
deportivas en vivo, senón que tamén sería promotora e, en moitos casos, emisora
das retransmisións, lucrándose diso.
Aseguran que “existen indicios de que a actividade desenvolvida pola web
rojadirecta.me supón unha vulneración dos dereitos de produción de gravacións
audiovisuais e radiodifusións” ao que engaden que “se realiza coa colaboración
consciente dos demandados”.
Cómpre destacar que en 2010 xa se
arquivou definitivamente a causa contra Rojadirecta por mor dunha denuncia de
Audiovisual Sport en 2007, resolvéndose que Rojadirecta nin realiza
retransmisións nin aloxa contidos audiovisuais, o que contrasta cos resolución
actual, de difícil cumprimento, xa que resulta evidente que a páxina web
denunciada non realiza retransmisións de vídeo por si mesma, senón que limítase
a recompilar retransmisións de terceiros. O bloqueo dos seus contidos tamén
podería ser algo complexo, como se demostrou con moitas outras páxinas web
supostamente bloqueadas no pasado, á que en moitos casos é relativamente doado
acceder mediante nomes de dominio alternativos (de feito, Rojadirecta mudou de dominio
de primeiro nivel en numerosas ocasións), servidores de DNS situados fóra de
España ou outras prácticas que converten a meirande parte de medidas de control
en simples atrancos temporais.
ACTUALIZACIÓN: Rojadirecta apelará as medidas cautelares.