Un mozo virtual supera o Test de Turing

Durante moitos anos vénse falando dos avances na intelixencia artificial colocando como un dos grandes retos a superar o popular Test de Turing, que consiste en superar unha serie de preguntas sen que un interlocutor humano poida diferenciar se está a conversar con outra persoa ou cunha máquina, o que parece ter conseguido Eugene Goostman, un programa informático ruso que simula ser un mozo de 13 anos, que foi posto a proba o pasado sábado pola Royal Society de Londres, onde convenceu ao 33% dos xuíces de ser humano, superando a barreira do 30% que se tiña fixada para considerar que se supera a proba durante unha sesión de chat de 5 minutos.
Aínda que resulta difícil asegurar que estamos ante a primeira ocasión na que se consegue tal fito (outros equipos de desenvolvemento teñen asegurado conseguir tal logro nos últimos anos) estamos ante un caso contrastado, que serve para constatar os grandes avances que están a producirse neste eido que facilitará que a tecnoloxía sexa cada vez máis humana e, polo tanto, poidamos interactuar con ela dun xeito máis natural.
A proba tivo lugar durante a celebración do 60º cabodano de Alan Turing, investigador que deu nome a este curioso test que pretende medir certos avances en computación ante a dificultade de definir o que podería considerarse como pensar por parte dunha máquina, converténdose nun dos piares da filosofía da intelixencia artificial (aínda que cun rigor moi discutible, pois ten importantes eivas que radican principalmente no feito de medir comportamentos en vez de ponderar a intelixencia real).