UCGAL fai un chamamento a prol de máis seguridade e privacidade no ecommerce
venres, 15 de marzo do 2019
Hoxe
celébrase o Día Mundial dos Consumidores e a
organización galega UCGAL vén de lanzar un comunicado no que avoga
por facer fronte común para que as redes, en relación ao comercio,
sexan quen de achegar recursos en positivo. Para UCGAL, ten moito
de significativo o feito de que esta mesma semana se cumprisen os 30
anos da World Wide Web e, ao mesmo tempo, se celebre a xornada
mundial dos consumidores, cuxo lema deste ano é Produtos
intelixentes de confianza. Da confluencia destas dúas
conmemoracións temos que saber extraer vantaxes universais e esixir
as máximas información, seguridade e privacidade sobre o que
mercamos e usamos online, sinala a organización galega,
Para
UCGAL, é un feito destacábel o moito que ten mudado a nosa vida coa
chegada da Internet: “Ninguén pode entender o seu día a día sen
ela, tanto é así que nun recente informe da AIMC ( Asociación para
la Investigación de Medios de Comunicación) o 45% dos internautas
aseguraba estar conectado e activo na Rede case constantemente e un
49% dicía que non podería vivir sen Internet no seu móbil”.
Os
consumidores galegos tamén lembran que nestas tres décadas de
conexión dixital, a Rede tamén xerou novas maneiras de consumir e,
tamén, diferentes tipos de consumidores: “A última fronteira
rompeuse coa aparición dos produtos intelixentes conectados (IoT, a
Internet das cousas); produtos como os smartphones, os
brazaletes de fitness, os asistentes activados por voz, algúns
xoguetes e automóbiles, ou os televisores intelixentes que reciben,
recopian e envían datos e información sobre as persoas usuarias”.
Porén,
malia todas estas oportunidades e comodidades para as persoas
consumidoras, UCGAL recoñece que “existen unha serie de
problemáticas neste novo paradigma que deberían preocuparnos: a
seguridade dos nosos datos e a privacidade da nosa información”.
Por esta razón, engade a entidade galega, este ano o Día Mundial
dos Consumidores ten como lema Produtos intelixentes confiables.
“Nun mundo no que cinco mil millóns de persoas teñen unha
conexión de Internet móbil, os consumidores demandan e precisan
unha conectividade maior e de calidade e un desenvolvemento de
produtos e servizos que coloque no centro ás persoas”, informa a
organización, recordando que o devandito deriva nun fluxo de
información constante, que non só é requirida (a información)
polos usuarios de a pé, senón polas entidades e empresas que operan
en Internet: “A realidade é que cando mercamos, vemos unha serie
en Netflix, corremos 10 quilómetros polo parque, consultamos
información con Alexa, etc… perdemos o control sobre a nosa
información de carácter persoal e a nosa privacidade diante de
grandes corporacións que deciden que é tendencia, que comemos, que
bebemos en definitiva, que consumimos; que recollen e fan rendíbeis
todos eses datos sen que o consumidor teña a menor idea do que lle
están quitando”.
UCGAL,
ao fío do devandito, lémbramos que “é importante esixir e
traballar para que a transparencia das empresas e a súa
responsabilidade para cos consumidores nas súas relación de consumo
a través da Internet iguale ao estándar da vida offline”.