Trine 3: The Artifacts of Power sae á venda

Tras consolidarse como un excelente xogo de plataformas en dúas dimensións ao longo de dúas entregas, Trine converteuse en toda unha franquía de referencia entre os xogos independentes do seu xénero, pero o estudio finlandés Frozenbyte non parecía conformarse con tal formulación, e ousou a lanzar onte Trine 3: The Artifacts of Power, unha nova iteración da saga para PC que podemos mercar inicialmente a 19,79 euros (xa que ten un 10% de desconto até o 27 de agosto para celebrar o seu lanzamento) e supón o salto da saga á terceira dimensión dun xeito bastante atinado.
Este xogo tivo un período de Early Access para facilitar o seu pulido, polo que estamos ante un título bastante probado, que sen dúbida encantará aos seareiros dos xogos fantásticos que combinan acción, plataformas, quebracabezas e aventuras. Esta nova entrega mantén a esencia de Trine e Trine 2, de xeito que o seu salto á terceira dimensión é principalmente unha mellora estética. No xogo teremos modo individual ou cooperativo con até 3 xogadores locais ou en liña, ou sexa, que volveremos a xuntar ao cabaleiro Pontinus, o mago Amadeus e a ladroa Zoya, que se embarcan nunha nova aventura que chega con voces e subtítulos en inglés, francés, alemán e español.

Trailer de lanzamento de Trine 3: The Artifacts of Power