Tres hospitais estatais lanzan unha aplicación específica para coidar a voz
luns, 13 de abril do 2015
Esta semana, o día 16,
celébrase a nivel internacional o Día Mundial da Voz. Coincidindo
con este festexo, moi relacionado tematicamente, especialistas dos
hospitais universitarios Ramón y Cajal de Madrid, Porta do Mar de
Cádiz e Central de Asturias están a presentar a que sería, nas
súas palabras, “a primeira aplicación en español para coidar a
voz”. A ferramenta Coide a súa voz (en
castelán Cuide su voz)
apréndenos como recoñecer os síntomas perante os cales debemos
acudir a un médico e as pautas máis axeitadas para manter a voz nun
estado óptimo. Está
dispoñíbel para Android a un prezo de 1,21 euros.
Este software, entre
outras cousas, fornece aos usuarios consellos xerais sobre o coidado
da voz e tamén imparte unhas liñas específicas para colectivos
determinados como docentes, cantantes, locutores, actores, anciáns,
nenos e pacientes que xa fosen intervidos cirurxicamente dalgunha
patoloxía. A aplicación tamén achega, noutro apartado, os signos e
síntomas que deben facernos acudir ao especialista para descartar
calquera tipo de patoloxía da voz. Ademais, permite escoitar as
voces das patoloxías máis frecuentes ou características, entre
outras: cancro, cordectomía, disfonía espasmódica, edema de
Reinke, esclerose lateral amiotrófica, nódulos, parálise de corda,
pólipo, quistes e sulcus estriado.