Toni Nadal mostra este xoves as vantaxes de extrapolar o adestramento deportivo ao eido TIC
mércores, 11 de decembro do 2019
Este
xoves 12 de decembro o
Colexio Profesional de Enxeñaría en Informática de Galicia (CPEIG)
vai organizar unha conferencia “inspiradora e motivacional” ao
servizo das empresas e profesionais do sector. A sesión,
titulada Todo se puede entrenar, centrarase nas vantaxes
multireccionais do adestramento profesional en clave colaborativa e
tecnolóxica. Trátase dunha sesión de coaching impartida
polo coñecido adestrador de tenis Toni Nadal, adestrador durante
case tres décadas do tenista Rafa Nadal.
Será
no salón de actos da Escola Galega de Administración Pública
(EGAP) en Santiago de Compostela, ás 20 horas, organizada polo
Colexio e patrocinada por diversas empresas do sector TIC con
presenza na nosa terra: R, Hewlett Packard Enterprise (HPE), Taisa,
VMware, Mindsait-Indra DXC, Pure Storage, Everis e Altia. Está
previsto que acudan máis de 200 persoas, entre profesionais do
sector e colexiadas e colexiados do CPEIG.
Segundo
informa o CPEIG acerca dos obxectivos da xornada, esta xirará
arredor da utilidade de reflexionar e establecermos novas metas e
propósitos profesionais, “respectando o uso ético das novas
tecnoloxías, sempre a favor das persoas, a igualdade e a mellora da
calidade de vida”. Na súa intervención, o que fora adestrador do
gran Rafa Nadal fará un repaso a todos os principios que inspiran o
seu método de éxito, comezando pola defensa da formación do
carácter fronte á formación técnica, como piar indispensábel do
triunfo: “Todo o que facilita as cousas en exceso, debilita, e isto
é o que acontece hoxe coas tecnoloxías, que substituíron a parte
esencial do ser humano, que é a súa mente”.