Thronebreaker chega a consolas

martes, 4 de decembro do 2018 Marcus Fernández

Coa triloxía de xogos de The Witcher rematada, CD Projekt Red non deixa morrer a franquía, e hoxe estrea para Xbox One e PlayStation 4 o xogo Thronebreaker: The Witcher Tales, dispoñible dende hai uns días para PC, que ten todas as bazas para converterse nun éxito, xa que está moi ben orientado aos que xa gustaron dos anteriores xogos da saga.
Estamos ante un xogo de rol de naipes para un xogador ambientado no mundo de The Witcher, no que hai que tomar decisións e entran en xogo personaxes complexos e multidimensionais. Na creación deste xogo participaron desenvolvedores involucrados en The Witcher 3: Wild Hunt, e narra o relato rexio de Meve, unha raíña curtida en mil batallas, soberana de dous dos Reinos do Norte (Lyria e Rivia) que ante unha inminente invasión ten que entrar en guerra e partir nunha sinistra viaxe de destrución e vinganza.
Temos así un xogo de rol que combina exploración con grande énfase na trama, con quebracabezas únicos e mecanismos de combate por quendas dos naipes. Está inspirado en clásicos como Magic: The Gathering; tira proveito da típica moralidade ambigua de The Witcher (que abre moitas posibilidades en consecuencia das decisións que vaiamos tomando); estaría protagonizado por un personaxe coñecido pero pouco explorado até o momento; e finamente ofrece máis de 30 horas de xogo, polo que considerouse axeitado convertelo nun título con entidade de seu e non integrado no xogo de naipes GWENT (xa que a historia da raíña Meve era bastante grande, merecedora dun xogo independente).

Tráiler do xogo

PUBLICIDADE