The Interview factura 15 millóns de dólares na súa estrea en liña

O filme The Interview continúa a dar que falar, xa que a súa complicada estrea tras os problemas de Sony Pictures con Corea do Norte e as ameazas indeterminadas recibidas polas salas físicas de exhibición converteron a esta produción en todo un experimento, xa que estreouse simultaneamente en 331 cines independentes e a través de varias plataformas de streaming, o que serve para coller o pulso deste tipo de plataformas en liña.
A explotación en salas convencionais durante a primeira fin de semana longa (comezou o día de Nadal)de The Interview saldouse cunha recadación aproximada de 2,8 millóns de dólares, o que pode considerarse como un auténtico desastre se temos en conta que falamos dunha película cun orzamento de 44 millóns de dólares, pero que foi parcialmente paliado grazas ás vendas de billetes no seu formato electrónico, xa que bateu todas as marcas existentes superando os 2 millóns de alugueres/compras en liña, o que suporía uns 15 millóns de dólares. Temos así que The Interview é a estrea en liña de máis éxito na historia de Sony, aínda que iso tampouco é un grande logro, xa que as salas convencionais sempre puxeron moitos atrancos para evitar as estreas simultáneas, e é de agardar que continúen na mesma liña.

Tamén en iTunes

O filme comezou a comercializarse a través dunha páxina web creada para a ocasión (que curiosamente propiciou a distribución de centos de milleiros de copias nas redes P2P xa que era doado realizar unha copia local da película para compartila libremente) así como en populares servizos como Google Play, Xbox Video e YouTube Movies, aos que nas últimas horas incorporouse iTunes, limitándose esta canle de distribución só a EE.UU. e Canadá, condición que está a considerarse como un dos principais motivos para a distribución da obra a través de redes de intercambio de ficheiros.

Chiando en directo

Para facer aínda máis completa a experiencia de visualización de The Interview, un dos seus protagonistas (Seth Rogen) e o seu co-director (Evan Goldberg) decidiron ver a película durante a pasada fin de semana á vez que publicaban chíos en Twitter sobre a mesma, aos que tamén se uniría James Franco, de xeito que a Rede serviu para facer o papel da versión comentada da produción que moitas veces atopamos na súa versión en DVD e Blu-ray. Non sería de sorprender que este tipo de práctica se normalizase no futuro para moitas outras estreas no mercado doméstico como un xeito máis de que os autores conecten co público.

Problemas legais

A cantante Yoon Mi-rae iniciará accións legais contra Sony Pictures por empregar unha das súas cancións sen permiso

Pero Corea do Norte e os ataques informáticos non son os único problemas que está a atopar The Interview, senón que agora tamén sabemos de que a cantante Yoon Mi-rae denunciou que na película empregan o seu tema Pay Day sen a súa autorización, xa que, aínda que a súa axencia, Feel Ghood Music, iniciara conversas para a incorporación do tema no filme, as negociacións non remataran, polo que Sony Pictures fixo uso da canción sen contrato de ningún tipo.
O uso do tema musical na película non só precisaría do pagamento dos dereitos de uso, senón tamén da correspondente autorización, xa que emprégase nun momento no que se asocia con Kim Jong-Un e o hedonismo, o que podería prexudicar á imaxe de Yoon Mi-rae, aínda que o máis normal sexa que a polémica ao redor de The Interview só lle ocasione unha maior visibilidade magnificada polo anuncio de que iniciará accións legais contra Sony Pictures.