Televés dá por concluído o seu Plan NP100 de renovación do catálogo de produtos
martes, 29 de maio do 2012
A firma de telecomunicacións compostelá, Televés, que a finais de xaneiro
de 2011 puxo en marcha un ambicioso plan para renovar, como mínimo, un cento dos
seus produtos nun período de 18 meses, vén
de dar por rematado o chamado Plan NP100, e faino dous meses antes de
concluír o prazo establecido.
Din os seus responsables que “conclúe
así un ambicioso e complexo proxecto que puxo a proba a capacidade de
innovación e resposta ao mercado da compañía”, segundo engaden, “líder no desenvolvemento e fabricación de
equipos para a redacción, medida e distribución de sinais de radio-televisión”.
Ao feito de lograr o obxectivo, que xa de por si era complexo, hai que engadirlle
que a compañía fíxoo nun tempo récord, moi por debaixo do establecido, o que
demostra a capacidade de desenvolvemento e de implicación de todo o persoal da
firma galega.
Sergio Martín, responsable de Comunicación de Televes Corporation explica
que o plan de renovación de catálogo “apórtalle valor aos clientes, e contribúe
a revitalizar a actividade no sector das infraestruturas de telecomunicacións”.
Novidades en tódalas áreas de distribución do sinal de televisión
As novidades lanzadas ao abeiro do NP100, das que
fomos dando detallada conta en Código Cero, cobren tódalas áreas de especialización
nas que traballa Televés, que van dende a Captación de sinal, da que lanzou 21
produtos, pasando pola de Xestión de cabeceira (32 produtos), Distribución
(44), Recepción (1) e Medición (2 produtos).
Os desenvolvementos, segundo afirman, centráronse
en moitos casos na “reenxeñaría
electrónica e redeseño dos chasis para producir equipos de reducidas dimensións
e de rendemento máis eficiente", aclaran.