Telefónica valora liberar os móbiles que comercializa entre os seus usuarios

Telefónica España informou este xoves, a través do seu presidente Luis Miguel Gilpérez, presente no Encontro de Telecomunicacións que acolle a Universidade Internacional Menéndez Pelayo en Santander, que a compañía está a valorar fondamente a liberalización dos móbiles que comercializan aos seus clientes, estratexia que tería capacidade de abondo como para cambiar a face actual do sector, tendo en conta o que vende Telefónica no país. A posíbel venda de aparellos ceibes viría motivada en boa medida polo remate das axudas aos trebellos que ía ligada á busca de novos usuarios.
Polo tanto, coa fin das subvencións, a operadora podería suprimir a tecnoloxía que limita cada móbil fóra do eido da compañía orixinal que o vendeu. Esta tecnolóxica coñécese como SIM lock e aplícase non só no caso de Telefónica senón no resto das grandes operadoras que traballan en España. Os plans achegados por Gilpérez complementaríanse con outra liña estratéxica a ter en conta: acadar que a metade dos fogares españois teñan fibra óptica no ano 2015, e todo isto con velocidades de máis de 100 megas. Arestora, dixo, a cobertura de fibra con 100 megas chega ao 12% dos fogares e empresas do ámbito estatal. Sinalar que Telefónica investiu nesta tecnoloxía 256 millóns de euros en 2011 e a previsión é ir alén dos 300 neste ano en curso.