Telefónica métese na listaxe de firmas TIC máis sustentábeis
venres, 11 de setembro do 2015
Telefónica vén de obter
un importante recoñecemento en materia de sostibilidade ao ser
incluída entre as novas compañías líderes deste ámbito (o
sustentábel) do sector tecnolóxico mundial. A listaxe de empresas
máis salientábeis foi feita en base ao índice Dow Jones
Sustainability Index (DJSI) pola axencia RobecoSAM. A posición da
operadora española na clasificación mellora en cinco puntos a súa
marca de 2014. A
dita axencia valorou a Telefónica con 85 puntos sobre 100, ou
sexa 29 puntos porcentuais máis cá media do sector. A dita listaxe
de nove firmas de telecomunicacións elaborouse a partir de 71 firmas
candidatas pola súa capitalización bolsista.
Como dixemos, Telefónica
foi quen de mellorar a súa puntuación con respecto ao acadado o ano
previo, e fíxoo en tres das dimensións do índice: as dimensións
económica, ambiental e social. O índice, sinala a operadora, define
a sustentabilidade corporativa como “un enfoque de negocio que
persegue crear valor a longo prazo para os accionistas mediante o
aproveitamento de oportunidades e a xestión eficaz dos riscos
inherentes ao desenvolvemento económico, ambiental e social”.
Nun plano máis concreto,
Telefónica foi recoñecida como a empresa con mellores prácticas en
seis aspectos clave do sector, encabezado con 93 puntos pola compañía
coreana KT Corp. “Por segundo ano consecutivo”, informan fontes
da operadora, “fomos o número un en prácticas laborais e dereitos
humanos e impacto dos servizos de telecomunicacións, e ademais
lideramos por vez primeira os temas de estratexia e transparencia
fiscal e campos electromagnéticos”. A compañía acadou 100 sobre
100 puntos nas seguintes materias. estratexia e transparencia fiscal;
estratexia para o cambio climático; campos electromagnéticos;
impacto dos servizos de telecomunicacións; prácticas laborais e
dereitos humanos; e compromiso coa cidadanía e filantropía.