Telefónica e Everis impulsan tecnoloxías para xerar información de valor dende o espazo
xoves, 3 de novembro do 2016
Os
avances para emprazar recursos de seguimento no espazo que nos
permitan (paradoxalmente) coñecer mellor a Terra (coñecernos mellor
a nós mesmos) veñen
de recibir un importante pulo da man de Everis e o Grupo Telefónica
(a través da plataforma de crowdworking Telefónica Open
Future, da que forma parte a palestra de proxectos innovadores do
monte Gaiás en Compostela, Galicia Open Future). Máis polo miúdo,
ámbalas compañías (xunto con IDOM, Orza, Axis-Ico, o Goberno de
Euskadi e a Deputación de Bizkaia) anunciaron onte que achegarán un
investimento de 2,3 millóns de euros para impulsar o lanzamento de
Satlantis. Esta firma
innovadora con sede en Bilbao ten o obxectivo de desenvolver
tecnoloxías para ofrecer produtos e solucións de información
inxente (Big Data) xerados dende alén da nosa bóveda
celeste. Con esta ampliación de capital a empresa poderá emprazar
no espazo as súas avanzadas cámaras de observación da Terra.
Entre
as principais achegas de Satlantis atópase, por certo, a tecnoloxía
iSIM, unha óptica de imaxe de alta precisión con fotografías
“submétricas” para satélites que orbitan a 500 quilómetros de
distancia. Segundo informou onte Telefónica, “este reto
tecnolóxico compite no mercado contra satélites valorados en
centenares de millóns de euros de investimento, e dotados con
cámaras de grandes dimensións”. Porén, engadiu a operadora,
Satlantis ofrece pola contra “unha miniaturización da cámara até
os oito quilos de peso e un investimento moi inferior aos actuais
prezos”. En palabras de Telefónica, “o peche desta rolda de
investimento confirma o éxito do desenvolvemento tecnolóxico desta
compañía nos seus dous anos de existencia, así como o acerto na
selección de Bilbao como a súa sede mundial”.
- Juan Tomas Hernani, CEO de Satlantis, e Rafael Guzmán, CTO de Satlantis
Entre
os eidos potenciais de actividade das tecnoloxías desenvolvidas pola
firma vasca atópanse cousas como o rexistro e seguimento do
territorio, o estudo da climatoloxía (cada vez máis importante
fronte aos desastres provocados polo cambio climático, do que se
espera atopar pautas que nos permitan estar mellor preparados para
afrontalos), os fluxos migratorios ou a presenza de recursos
pesqueiros. Isto polo que se refire ao traballo das institucións
públicas, pero o abano de posibilidades amplíase en boa medida
grazas á concorrencia das empresas. Moitas delas, de feito, levan
anos procurando tecnoloxías accesíbeis que lles permitan protexer
as súas infraestruturas, integrando esta información cos seus datos
de terra.
Telefónica,
que participa neste investimento por medio do seu programa de
innovación aberta Telefónica Open Future, informou que “formar
parte de Satlantis” representa “a oportunidade de ofrecer aos
seus clientes o mundo do Big Data xerado
desde o espazo”.