Telefónica dotará con redes de alta velocidade o Concello de Ames
venres, 18 de maio do 2018
O
Concello de Ames vén de adxudicar o contrato do servizo de
telecomunicacións (fixa e móbil), o acceso á Internet de banda
larga e transmisión e almacenamento de datos da Administración
local á UTE constituída por Movistar e Telefónica por un período
inicial de tres anos e un importe de 263.158,06 euros (IVE incluído).
Segundo explica o Goberno de Ames, o novo contrato “implica unha
serie de vantaxes e melloras respecto ao anterior servizo que fora
adxudicado en novembro de 2011 sen proceso público algún”. En
primeiro lugar, medra a velocidade de acceso coa previsión de que
chegue aos 250 Mbps simétricos. Trátase dunha optimización moi
significativa, tendo en conta, segundo explica o Concello, que se
parte da base dos escasos 20 Mbps actuais.
Asemade,
as velocidades de conexión coas sedes remotas (Milladoiro) chegarán
aos 60Mb, “o que fai posíbel unha xestión máis áxil da
documentación”, engaden fontes do Executivo local, que explican
que a iniciativa insírese no plan local de modernización da
Administración e que, amais do devandito a nova adxudicación tamén
implica “unha mellora da infraestrutura de rede local”. De feito,
inclúese a substitución de tódolos switchs para “conseguir
un incremento da velocidade dentro da rede local, xunto con melloras
nas liñas de backup e no proceso para gardar documentación
municipal cos criterios necesarios de seguridade”.
O
Concello tamén apunta que con este novo servizo búscase mellorar a
instalación dos puntos Wi-Fi, de xeito que se instalará un novo
sistema sen fíos para as casas da cultura de Bertamiráns e do
Milladoiro, así como para a biblioteca do Milladoiro. Asemade,
porase en xogo “un incremento substancial do espazo de
almacenamento dos servidores locais, permitindo unha mellor
almacenaxe e xestión da documentación entre o persoal do Concello,
así como entre a veciñanza e a Administración”.
As
transformacións e melloras non rematan aí, xa que tamén atinxen ao
sistema de telefonía, tanto fixa como móbil, que pasa a ser un
sistema IP, “máis fiábel e con novos terminais de última
xeración que serán xestionados a través dunha centraliña central
que será a encargada da xestión das chamadas ao Concello, cun novo
sistema de atención telefónica de saltos e no que se dará
prioridade as chamadas aos diferentes departamentos”.
A
maiores de todo o devandito, co novo sistema de telefonía o Concello
e as operadoras instalarán un novo servizo 092 para a Policía Local
e introducirán melloras no servizo de streaming ate chegar
aos 600 GB de almacenamento (permitíndose a reprodución de contidos
dixitais en directo).