Telefónica achegará cobertura 5G ao 75% de España antes de rematar o ano

O presidente executivo de Telefónica, José María Álvarez-Pallete, anunciou hoxe a posta en marcha da súa rede de telefonía móbil 5G, asegurando que este paso que ten lugar en todas as comunidades autónomas acelera a dixitalización das pemes, das Administracións públicas e dos cidadáns.
Telefónica lanzará unha oferta tanto para particulares como para empresas, prevendo chegar ao 75% da poboación española antes de rematar o ano, e aseguran que esta nova tecnoloxía suporá moitos beneficios transversais, directos e indirecto, afectando a sectores como o transporte, o turismo, a enerxía, a automoción ou a saúde. Álvarez-Pallete salienta que a 5G «é unha revolución polas súas aplicacións prácticas para todos os sectores e porque permite ampliar a cobertura de ultra banda larga nas zonas rurais e na España baleirada».
A nova xeración de telefonía móbil permite a conectividade ultrarrápida e con capacidades diferenciais en termos de largo de banda, tanto de subida como de baixada, moi baixa latencia e capacidade para conectar a millóns de dispositivos. Unha transformación que facilitará a conexión dos nosos obxectos de uso cotián, o que será unha grande transformación tecnolóxica e social.
Na primeira fase Telefónica despregará 5G NSA e DSS (como xa fixeron outros operadores) utilizando as bandas de 3,5 GHz e as bandas medias (1.800-2.100 MHz) empregadas actualmente pola 4G, podendo empregar 4G e 5G á vez. Máis adiante continuarán coa tecnoloxía 5G SA, que será a que realmente ofrecerá as melloras prometidas.
A chegada da 5G facilitará o abandono de vellas tecnoloxías, e así Telefónica prevé o apagado da súa rede 3G en 2025, cando tamén está previsto que a súa rede de cobre estea totalmente substituída por unha rede de fibra óptica.