Tagen Ata e a UDC achegan ao alumnado un completo feixe de cursos online
xoves, 17 de marzo do 2016
A cooperativa galega Tagen Ata,
especializada en formación e ferramentas informáticas libres, está
a impulsar o ensino TIC avanzado xunto coa Escola
de Relacións Laborais da Universidade da Coruña (ERLAC). Máis
en detalle, trátase dunha serie de cursos en liña destinados a
ampliar o coñecemento tecnolóxico-dixital da nosa mocidade
universitaria. Lembrar que Tagen Ata, firma
da que temos falado en Código Cero para salientar a funcionalidade
educativa e divulgativa da súa web Formación en Rede, ten unha
ampla experiencia no fornecemento de cursos de balde e cursos non
gratuítos en liña, “na liña actual de promover un novo concepto
de formación áxil, interactiva e en continuo cambio”, salientan
as impulsoras da cooperativa. Por
exemplo a media ducia de obradoiros postos en marcha co comezo de
curso.
Volvendo á andaina formativa encetada coa ERLAC, sinalar que se
trata dunha achega situada a medio camiño entre os cursos gratuítos
en liña de diferentes universidades de referencia e a formación
práctica de profesionais. Con esta iniciativa, a devandita Escola da
UDC e Tagen Ata queren sumarse ao “fenómeno de impulso á
formación online a través de Internet”.
Segundo explican dende a cooperativa acerca dos obxectivos destas
propostas educativas, “moitos son os xigantes cos que parece que se
compite nesta nova moda e tendencia”. Por exemplo: Coursera, EDX,
Miríada ou o propio Google. “Con todo”, engaden, “desde
Formación en Rede de Tagen Ata pensamos que toda a diversidade
formativa ofrecida vai completando un universo de novos coñecementos
necesarios e aproveitables para os e as futuros profesionais que
están reciclándose ou iniciando unha preparación profesional nunha
das nosas universidades”.
Ao longo destas semanas Tagen Ata participou na propia ERLAC na
presentación das ditas actividades formativas en liña, neste caso
centradas na economía social e o cooperativismo, para o estudantado
deste centro. “Neste sentido”, comentan dende a cooperativa,
“sorprendeunos o escaso coñecemento deste tipo de formación entre
os e as universitarios”. Por esta razón, dende Tagen Ata e dende a
ERLAC agardan colaborar co traballo de difusión para o coñecemento
deste tipo de ensino. Aínda así, engaden, dentro dunha perspectiva
actual os cursos “están abertos a calquera persoa que desexe
reciclarse”.
A Escola de Relacións Laborais da Coruña e Tagen Ata teñen aberta
a matrícula para estas actividades que poden complementar a
formación universitaria das e dos profesionais da xestión,
relacións laborais ou recursos humanos. Neste lote o alumnado poderá
acceder a un curso de Prevención de riscos TIC gratuíto ao
matricularse nun dos Cursos de Cooperativismo. A matrícula fica
aberta até o 29 de marzo.
Ademais, desde Formación en Rede, de Tagen Ata, ábrese de novo o
prazo de matriculación en Docentes eLearning. Até o 15 de abril. O
curso comezará o 19 de abril.
Cursos Online de Cooperativismo e Economía
Social con Certificado da ERLAC
· Prevención de
Riscos Laborais nas novas Tecnoloxías da Información e a
Comunicación (TIC). Duración: 15 horas. De balde.
· Iniciación á
Cooperativa de Traballo. Duración: 34 horas. Prezo: 48,10 euros.
· Formación para o
Emprendemento Cooperativo. Duración: 70 horas. Prezo: 100,10 euros.
· Xestión de
Cooperativas de Traballo. Duración: 66 horas. Prezo: 94,90 euros.
· Contabilidade para
Cooperativas. Duración: 75 horas. Prezo: 107,90 euros.
A estas iniciativas
formativas cómpre engadir un Curso Online Docentes eLearning.
· Docentes
eLearning. Duración: 60 horas. Prezo: 87 euros.