Super Smash Bros. Ultimate destaca no último Nintendo Direct
martes, 12 de xuño do 2018
Aproveitando
a celebración do E3 en Los Ángeles publicouse
un novo Nintendo Direct no que, aparte do anuncio do
lanzamento de Fortnite para Nintendo
Switch hoxe mesmo, centráronse nos lanzamentos que chegarán á Switch nos
vindeiros meses, entre os que destaca especialmente Super Smash Bros. Ultimate,
xogo que verá a luz o 7 de decembro e que permitirá enfrontar a 8 xogadores á
vez en combates cargados de acción.
Un dos puntos fortes de Super Smash Bros.
Ultimate será, sen dúbida, o grande cadro de loitadores, xa que decidiron
integrar a todos os personaxes presentes nas preto de dúas décadas que ten esta
saga, converténdose nun dos meirandes crossovers
da historia de Nintendo. Estarán así presentes dende os personaxes dos xogos de
Mario, até os de Metroid ou Splatoon, pasando por Ryu, Cloud e Snake, de xeito
que os incondicionais da saga estarán encantados de ter a entrega máis completa
de todas que, ademais, poderá controlarse cos mandos Joy-Con, o mando Pro e
incluso os mandos de Nintendo GameCube (orixinais ou de novo deseño). Ao
estarmos ante un xogo de Switch temos como grande vantaxe o poder loitar tanto
en mobilidade como no salón da nosa casa, converténdose tamén na entrega máis
versátil desta serie.
O xogo será compatible con todas as figuras amiibo da serie Super Smash Bros., así como as figuras
dos loitadores presentes (aínda que sexan dun xogo doutra serie).
Nintendo tamén avanzou detalles de Pokémon:
Let’s Go Pikachu! e Pokémon: Let’s Go
Eevee!, que verán a luz o 16 de novembro, e que tanto poderán mercarse
soltos como cunha Poké Ball Plus.
Outros lanzamentos interesantes son o de Super
Mario Party para o 5 de outubro, Overcooked!
2 para o 7 de agosto, Octopath Traveler
para o 13 de xullo, Killer Queen Black
para este ano, Fire Emblem: Three Houses
para primavera de 2019, Daemon x Machina
para 2019 e Hollow Knight para hoxe
mesmo.
Tamén deron conta que este mesmo ano chegarán a Nintendo Switch títulos tan
importantes como EA Sports FIFA 19, Monster Hunter Generations Ultimate, Dragon Ball FighterZ, Dark Souls: Remastered, Wolfenstein II: The New Colossus e Starlink: Battle for Atlas, de xeito que
a consola de Nintendo vai ter unha segunda metade do ano moi intensa, facéndose
cada vez máis atractiva a súa compra, por contar cun catálogo cada vez máis
sólido e cun futuro garantido.
Nintendo Direct co gallo do E3 2018