Sony celebra o 15º aniversario de PlayStation Plus

PlayStation Plus, o servizo de subscrición de Sony, cumpre 15 anos este mes de xuño e, como agradecemento á fidelidade dos xogadores, ofrece un catálogo excepcional de xogos mensuais e un programa especial de actividades durante o verán.
Para comezar, os xogos dispoñibles para os subscritores durante o mes de xullo inclúen tres títulos destacados. Diablo IV, a nova entrega da mítica saga de Blizzard, chega á PS5 e PS4 como unha experiencia RPG de acción escura e absorbente. Os xogadores poderán embarcarse en solitario ou en grupo nunha campaña chea de criaturas demoníacas, alxubes de pesadelo e loita frenética, con opción de progresar en calquera plataforma grazas ao xogo cruzado e ao progreso compartido.
Tamén se incorpora ao catálogo The King of Fighters XV, que recupera a esencia clásica da loita por equipos 3 contra 3 e reúne a 39 personaxes entre veteranos e novas incorporacións. Con mecánicas pulidas e un código de rede mellorado para partidas máis fluídas, a versión para PlayStation Plus inclúe ademais o traxe Leona clásica, inspirado na súa aparencia en KOF ‘96.
Completando a oferta mensual está Jusant, unha proposta singular de escalada para PS5 que combina quebracabezas, ambientación relaxante e un relato minimalista sobre civilizacións esquecidas. A medida que os xogadores ascenden por unha torre monumental, deberán xestionar a súa resistencia, explorar camiños alternativos e dominar ferramentas para avanzar nun mundo cambiante e enigmático.
A maiores destes títulos, PlayStation Plus pon en marcha unha serie de accións especiais para conmemorar os seus 15 anos de historia. Os subscritores Premium poden acceder desde este mes a versións de proba de xogos tan esperados como WWE 2K25 e Monster Hunter Wilds, mentres que todos os subscritores, independentemente do nivel, poden desfrutar dun pack gratuíto de contidos cosméticos para Valorant e acceder a descontos exclusivos na PlayStation Store durante a fin de semana do 27 ao 29 de xuño.
Ademais, haberá torneo conmemorativo con títulos populares como Tekken 8, NBA 2K ou EA Sports FC, con premios que inclúen moeda virtual, avatares especiais e contidos audiovisuais. Por se fose pouco, os días 28 e 29 de xuño estará aberto o acceso ao multixogador en liña mesmo para quen non teña subscrición activa, e os usuarios de PlayStation Plus Premium poderán adquirir películas da tenda Sony Pictures Core cun desconto do 15 % ata o 12 de agosto.