SmartPEME imparte esta semana cinco novos obradoiros tecnolóxicos

A Deputación de Pontevedra, a través do programa de formación tecnolóxica e asesoramento SmartPEME, oferta esta semana cinco novas accións formativas mixtas impartidas de xeito online e presencial, enmarcadas na súa carteira de obradoiros. As accións tratarán temas como a fabricación dixital con filamento, o desenvolvemento dunha estratexia de mercadotecnia turística e correos electrónicos, Google Adwords (como entendelo e crear campañas eficaces), iniciación ao posicionamento en buscadores e redes (SEO) e fabricación dixital con debuxo 3D.
O martes 10 e o xoves 12 o encargado de dirixir os obradoiros será Manuel Freire, experto universitario en Robótica, Programación e Impresión 3D. Ambos talleres constan de 50 horas de duración e inclúense no novo formato mixto, que combina formación en liña (30 horas) e prácticas presenciais no Fab Lab (20 horas) do Centro Provincial de Economía Dixital no Viveiro de Empresas de Barro. O primeiro, Fabricación dixital. Impresoras de Filamento ten como obxectivo dar a coñecer as tecnoloxías implicadas no proceso de fabricación dixital deseñando pezas en 3D. O segundo, Fabricación dixital. Debuxo 3D con Onshape II - Partstudio II complementará a formación da semana anterior na utilización deste software 3D.
O martes, na quenda da tarde, o curso Desenvolve a túa propia estratexia de email márketing turístico centrarase en aprender como dar a coñecer a nosa empresa, os nosos servizos e valores mediante o correo electrónico e tamén, coñecer as vantaxes desta técnica, mellorar o deseño e medir o impacto das diferentes campañas. A condutora desta formación será Patricia Cabaleiro, posgraduada en Turismo pola Universidade de Santiago.
O mércores 11, pola mañá, Laura Carrera, graduada en Publicidade e Relacións Públicas, falará sobre Google Adwords, como entendelo e como crear campañas eficaces I .
Pola tarde, Adrián Fernández, licenciado en Comunicación Audiovisual pola Universidade de Barcelona, impartirá o obradoiro Iniciación ao SEO I: conceptos, palabras clave e primeiros pasos. Nel tratará de achegar os conceptos básicos que compoñen o SEO e amosará o proceso de transformación dun sitio web para mellorar o seu posicionamento nos principais buscadores aumentando o tráfico de usuarios ou clientes.