Santiago recibe 2 millóns de euros de fondos europeos para dixitalizar Abastos

O Ministerio de Industria, Comercio e Turismo vén de comunicar ao Concello compostelán a concesión dunha subvención de case dous millóns de euros para o proxecto Commarket Santiago, co que a concellería de Promoción Económica pretende dinamizar a oferta comercial de Compostela e mellorar a praza de Abastos. Farao mediante iniciativas como un marketplace.
A concelleira María Rozas deu conta este venres 22 de setembro das actuacións incluídas neste programa, que se desenvolverá ata mediados de 2024 e para o que o Concello achegará medio millón de euros de fondos propios. Fíxoo acompañada por Lucía Castro, responsábel técnica do departamento de Comercio.
A concelleira de Promoción Económica explicou que o proxecto ten como obxectivo "dinamizar, modernizar e fortalecer o tecido comercial de Santiago, que se enfronta a importantes retos como a escasa adaptación tecnolóxica e dixital, ou a falta de relevo xeracional". María Rozas explicou que boa parte das accións de Commarket Santiago afectan á praza de Abastos, como por exemplo a reforma das marquesiñas e dos baños e a renovación das portas corredeiras (en fase de licitación).
Ademais, vanse substituír as luminarias e instalarase a rede Wi-Fi do mercado.
Ademais, a praza será unha das beneficiarias do marketplace que se porá en marcha grazas á subvención concedida polo Ministerio de Industria, Comercio e Turismo. Trátase dunha gran plataforma en liña na que os comerciantes poderán vender os seus produtos e servizos, "de maneira que os vendedores accederán a unha clientela máis ampla e diversa, e os compradores terán ao seu alcance unha maior variedade de produtos locais". De feito, no proxecto prevese a incorporación das "paisanas" da praza de Abastos neste modelo, para que tamén poidan realizar vendas online.
A entrega dos produtos adquiridos a través do marketplace farase ben a domicilio mediante repartidores, ou ben en puntos de recollida que estarán localizados en diferentes lugares da cidade. Nesta liña, o proxecto prevé a instalación de armarios refrixerados nos que os clientes poderán recoller a súa compra de produtos frescos sen ter que desprazarse ata o mercado, e garantindo a correcta conservación dos alimentos. Para seguir a rastrexabilidade dos produtos, haberá unhas etiquetas dixitais que facilitan o control do stock e a actualización de prezos para a venda online.
A transformación dixital do comercio é un dos obxectivos principais do proxecto Commarket Santiago, e nesa liña unha das accións máis ambiciosas é a creación da Oficina de apoio e transformación dixital +ComercioSCQ. Desde ela, profesionais especializados no sector TIC prestarán asesoramento personalizado aos comercios que o desexen, ao redor de cuestións como a atención ao cliente, a mercadotecnia en liña, a comunicación ou o financiamento. Ademais, prevese impulsar procesos de formación para traballadores e autónomos do sector comercio, co obxectivo de mellorar as súas habilidades dixitais para, ao tempo, mellorar a xestión dos seus negocios.
En canto á promoción do sector comercial, no Commarket Santiago contémplanse accións como o programa O comercio sabe do que fala, que prevé a gravación de pequenos vídeos protagonizados polos propios comerciantes, dándolle continuidade aos vídeo-consellos xa postos en marcha.
As últimas accións incorporadas ao programa Commarket Santiago teñen como obxectivo fomentar unha alimentación saudábel baseada na dieta atlántica. Con ese obxectivo porase en marcha unha aplicación móbil que permitirá crear menús semanais ou quincenais personalizados con produtos de tempada. Esta aplicación, que facilitará un receitario propio, podería estar conectada á marketplace, de modo que a persoa usuaria poida facer directamente a compra dos produtos que precisa para a elaboración dos seus menús e recollelos ben na praza de Abastos ou ben nos armarios refrixerados.