Santiago ponse este mércores no epicentro do debate arredor da ciberseguridade
martes, 17 de setembro do 2019
- Un dos relatorios da edición madrileña do congreso ISACA
Este
mércores 18 de setembro, a entidade internacional ISACA (Asociación
de Auditoría e Control de Sistemas de Información) organiza o I
Congreso de ISACA en Santiago de Compostela, que será inaugurado
sobre as 9.00 horas pola directora da axencia AMTEGA, Mar Pereira.
Tamén intervirán, entre outros, Román Ramírez, experto en
ciberseguridade e co-fundador de RootedCON
(referencial conferencia sobre cuestións ligadas á protección
tecnolóxica) ou Ricardo Barrasa, presidente de ISACA Madrid, que
serán os encargados de pechar e abrir a xornada, respectivamente.
Amais
dos representantes do Colexio
Oficial de Enxeñeiros en Telecomunicación de Galicia (o COETG)
e o Colexio Profesional de Enxeñaría
en Informática de Galicia (CPEIG), xa confirmaron a súa
presenza no evento uns 175 profesionais con cartos de
responsabilidade nas principais empresas da nosa terra. Na cita
porase o foco nos ámbitos das auditorías tecnolóxicas, a
ciberseguridade, os riscos TIC ou o goberno dixital, entre outros
eidos de actuación.
Será
unha xornada composta por relatorios e mesas redondas cos mellores
expertos en cada área, sempre “baixo un enfoque práctico e casos
de éxito”, informa ISACA, engadindo que o obxectivo é “conseguir
un intercambio de coñecemento esencial e necesario neste tipo de
xornadas, na que tamén terá cabida o networking”.
Fernando
Suárez, presidente do CPEIG, e Julio Sánchez Agrelo, decano do
COETG, participarán como relatores na mesa redonda A formación e
os profesionais en Galicia.
O
evento terá lugar na Cidade da Cultura de Galicia e calcúlase que
concorrerán uns cen expertos nas devanditas temáticas TIC. Por
empresas, centros tecnolóxicos e institucións, estarán presentes
(entre outras moitas) Gradiant, Abanca, R, Coren, Pintos &
Salgado Avogados, o CiTIUS, o CPEIG, o COETG, Emetel, Improsec ou
Tegra (Gradiant). Entre os patrocinadores atópanse firmas
referenciais galegas como Dinahosting.
A
inauguración está prevista para as 0.00 horas, no Centro de
Innovación Cultura do Gaiás. Como dixemos, o acto de benvida
correrá a cargo de Ricardo Barrasa, presidente de ISACA Madrid. A
continuación virá unha mesa redonda sobre ciberseguridade e logo,
sobre as 12.00, outra xeira de debate sobre riscos TIC no sector
industrial.