Santiago loce tecnoloxías turísticas innovadoras en FITUR
mércores, 22 de xaneiro do 2020
O
Concello de Santiago está no salón FITUR, en Madrid, dando a
coñecer as súas novas experiencias en materia de tecnoloxías e
turismo. No
marco da feira, o concelleiro de Turismo e Ano Santo, Sindo Guinarte,
e a xerente de Turismo de Santiago, Flavia Ramil, presentaron
Santiago Tech Compostela, unha nova liña estratéxica
que, segundo apuntou Sindo Guinarte, “ten por obxectivo empregar as
múltiples posibilidade que ofrecen as novas tecnoloxías para
mellorar a experiencia do turista en Santiago, co obxectivo de
motivarlle a ampliar a súa estadía na cidade”.
Ao
abeiro desta nova liña estratéxica de traballo, Turismo de Santiago
presentou tres proxectos concretos en FITUR: unha innovadora
aplicación para dispositivos móbiles (concibida como un recurso de
recomendacións de actividades para desenvolver e dispoñíbel en
sete idiomas); unhas novas audioguías, pensadas para escoitarse
dende dispositivos móbiles (accesíbeis nun innovador formato que
evita carrexar reprodutores MP3 e que consiste nunha tarxeta cun
código personalizado que se introduce na web de Turismo de Santiago
dando acceso indefinido a todo o contido das audioguías); e
participación no Bodah, un proxecto europeo liderado por Turismo de
Santiago que ten por obxectivo desenvolver unha ferramenta baseada na
análise de información a gran escala (Big Data) para
xestionar fluxos turísticos.