Santiago aposta pola iluminación intelixente na substitución integral do alumeado do concello

En Santiago comezaron este mes de maio os traballos para substituír os máis de 30.000 elementos lumínicos do concello que pasarán a ser LED. Concretamente, a primeira zona en renovar a iluminación pública foi a rúa do Hórreo, dando cumprimento ao compromiso adoptado polo Goberno local coa asociación de comerciantes Somos Hórreo. Ao longo dos vindeiros meses procederase a trocar os restantes elementos por luminarias LED intelixentes, que, nas zonas rurais virán acompañadas dun sistema de telecomunicacións 5G que permitirá coñecer en tempo real o estado de cada un dos farois e actuar de xeito inmediato no caso de incidencias.
Estas melloras permitirán un aforro económico anual estimado dun millón de euros, xa que se espera que o consumo enerxético diminúa en máis dun 70%, informou o Concello, que tamén contemplou a ampliación da rede en preto de 2.000 novas luminarias para puntos que se acordarán coas asociacións veciñais, pensando sobre todo en zonas sen luz do rural e nos barrios.
O proxecto adxudicado á UTE Ferrovial Construcción S.A. e ENDESA X Servicios S.L., será executado no seu 95% con provedores locais e suporá a contratación dunha vintena de operarios preferentemente do termo municipal de Santiago, que tamén se ocuparán dos labores de mantemento.