Santiago anima ás tendas a presumir de galego nas redes sociais
venres, 11 de maio do 2018
O Concello
de Santiago vén de pór en marcha a terceira entrega do seu certame
dirixido a visualizar o compromiso co galego dos establecementos
comerciais composteláns. Trátase do certame #Fotolingua,
unha iniciativa que se desenvolve nas redes sociais: no Facebook
e máis Instagram,
onde os responsábeis dos establecementos deberán pendurar unha
imaxe na que se reflicta a utilización da nosa lingua na actividade
de seu. O concurso foi dado a coñecer polo alcalde Martiño Noriega.
Segundo fixo saber, o galego ten vantaxes competitivas claras. Por
exemplo, dá prestixio, identidade e marca.
Noriega explicou que “cada vez temos máis
establecementos galego activos en Santiago, e estamos convencidos de
que a iso contribúen iniciativas impulsadas dende o Concello como o
certame Fotolingua, os premios de publicidade comercial en
galego ou os premios Manuel Beiras, neste caso en colaboración coa
Cámara de Comercio”.
A xeito de novidade, este ano púxose o foco en
promover o certame e fortalecer obxectivos, polo que se buscará ir
alén dos resultados acadados en 2017, ano no que se duplicaron as
imaxes presentadas nas redes sociais, que superaron o cento, como o
número de seareiros das redes sociais do #Fotolingua, máis
de 900.
As imaxes que concorran poden mostrar dende
escaparates a etiquetaxes, pasando por letreiros, elementos
decorativos ou cartaces. As fotos, sempre subidas ás redes como
“públicas”, deberán ir acompañadas polos tres cancelos do
concurso: #establecementoengalego, #fotolingua e
#ogalegovende.
O prazo para subir as imaxes ás
redes sociais pecharase o sete de xuño. Ao día seguinte o
coñecerase o nome das persoas gañadoras. Haberá agasallos para a
imaxe que obteña máis “gústame” en Facebook
ou "likes” en Instagram
na súa publicación orixinal, e para a imaxe seleccionada pola
organización pola súa orixinalidade ou capacidade para transmitir
valor positivo á lingua. As persoas que as publicaran recibirán
cadansúa cámara Polaroid Snap.