Samsung levará a GALAXY Camera 2 ao CES de Las Vegas

venres, 3 de xaneiro do 2014 Marcus Fernández

Samsung anuncia a sucesora da súa GALAXY Camara, un novo dispositivo con Android 4.3 que actualiza o seu procesador ata un catro núcleos a 1,6 GHz para facer máis doado disparar, editar e compartir imaxes cos amigos e a familia, mantendo un elegante deseño retro e un corpo lixeiro.
A Samsung GALAXY Camera 2 conta cun sensor CMOS BSI de 16 Mpíxeles, cun potente zoom óptico de 21x, 2 Gb de RAM, conectividade Wi-Fi e NFC, pantalla Super Clear Touch LCD de 4,8 polgadas, batería de 2.000 mAh e funcionalidades baseadas en aplicacións como a posibilidade de empregar Dropbox directamente dende a cámara (que inclúe unha subscrición ao servizo de almacenamento na nube de 50 Gb durante 2 anos, o que permite que non teñamos que preocuparnos por quedar sen espazo na tarxeta de memoria); ou facer uso de numerosos modos de disparo intelixente, así como poder mudar a velocidade das gravacións en vídeo (movéndose entre un rango de 8 veces máis rápido e 8 veces máis lento).
Esta nova cámara de 132,5 x 71,2 x 19,3 milímetros e 283 gramos de peso poderase ver a partir do vindeiro martes no CES de Las Vegas.

A Samsung GALAXY Camara 2 funciona con Android 4.3

PUBLICIDADE