Sada fai un chamamento ao empresariado local para integrarse na súa aplicación de turismo
mércores, 15 de xuño do 2016
A semana pasada
o Concello de Sada organizou unha xuntanza cos empresarios locais
para darlles a coñecer a
aplicación que avanzamos previamente en Código Cero e que se dirixe
a achegar un directorio empresarial web para favorecer o contacto
multidireccional entre empresas e comercios locais, por unha banda, e
veciñanza e turistas, pola outra. Na reunión participaron
arredor de 60 persoas. Celebrouse na Capela de San Roque, onde se
amosou o funcionamento da aplicación (que poderá estar dispoñíbel
este verán) e as vantaxes para o tecido empresarial de Sada e
contorna da súa inclusión na ferramenta móbil.
Esta ferramenta, fíxose saber, incluíra unha
listaxe de empresas de comercio, industria e hostalaría, coa
información que cada empresario queira achegar así como imaxes de
cadanseu negocio. As firmas locais xa poden inscribirse na guía
mediante unha enquisa en liña (a través da web sada.gal)
ou ben mediante un formulario dispoñíbel na Oficina de Turismo ou
na Concellaría de Promoción Económica.
Na reunión co tecido produtivo local participou
Liss Suárez Becerra, responsábel do departamento do Concello
responsábel da aplicación: a Concellería de Promoción Económica
e Turismo. Segundo fixo saber, “o feito de que esta concellaría
conte con datos actualizados para incluír na aplicación facilita o
envío de información que podería ser de utilidade para o
desenvolvemento da actividade comercial e empresarial”.
Ademais, Suárez Becerra convidou a todos os
presentes e as empresas de Sada a integrárense na nova ferramenta
dixital, unha novidade tecnolóxica, engadiu, “que está a ser moi
ben recibida polos primeiros establecementos que están a formalizar
a súa adhesión ao proxecto”. Segundo fixo saber, neste intre
estanse a aplicar algunhas melloras na app, “antes de que
estea operativa este verán”. Ao seu xuízo, estamos ante “unha
ferramenta fundamental para promocionar integramente o concello desde
o punto de vista turístico e para a promoción do tecido económico
local”.
Na xuntanza houbo representación do sector de
hostalaría, comercio e industria, e tamén do mercado municipal e
das asociacións veciñais. Aos profesionais fíxoselles saber que
poden inscribirse na guía empresarial até o 30 de xuño.