SHOWWX+, o proxector de peto para dispositivos móbiles de Apple

Os picoproxectores para realizar presentacións multimedia en mobilidade son un produto cada vez máis frecuente no mercado pola súa versatilidade, que parece mellorar aínda máis co SHOWWX+, un dispositivo de peto capaz de xerar unha imaxe cunha resolución de 848 x 480 píxeles a un tamaño de entre 12 a 100 polgadas, con 15 lúmenes e un contraste de 5.000:1 que opera en terminais de Apple que funcionen con iOS e teñan capacidades de saída de vídeo.
Este trebello de MicroVision promete ser o primeiro picoproxector laser capaz de achegar unha experiencia cinematográfica de grande pantalla transportable no peto, pois a súa batería achega unha autonomía de 2 horas, o que debería ser máis que suficiente para unha completa presentación ou incluso para a reprodución dunha película.
O SHOWWX+ é bastante versátil, servindo para presentar imaxes no respaldo dun asento de avión, nun recibidor ou nun ascensor, podendo proxectar unha pantalla que dobra en tamaño ás dos seus competidores á mesma distancia.
O produto parece funcionar axeitadamente en terminais coma o iPod Touch, o iPhone e o iPad grazas a un cable de compoñentes de vídeo incluído, aínda que tamén poderá empregarse con outros dispositivos coma móbiles, portátiles, cámaras.. que teñan saída de vídeo ou VGA, aínda que a un prezo un tanto elevado, pois o prezo recomendado nos EE.UU. é de 449 dólares (336,75 euros).

Vídeo de presentación do novo picoproxector de MicroVision