Roku presenta novos reprodutores multimedia de contidos remotos

xoves, 23 de setembro do 2010 Marcus Fernández

O anuncio dun dispositivo coma o Apple TV, con certas limitacións e un prezo excesivo (119 euros), non captou a atención de moitos consumidores, pero os que gusten de trebellos que leven os contidos multimedia do ordenador ao televisor estarán contentos ao saber que Roku pensa atender a súa demanda con varios dispositivos que parten dun básico Roku HD por 59,99 dólares (44,87 euros) que permite reproducir vídeo a 720p e ten conectividade Ethernet e Wi-Fi. Máis avanzado é o Roku XD, cun prezo de 79 dólares (59,91 euros) que xa soporta vídeo a 1.080p e conectividade Wi-Fi N e, coma colofón, o Roku XDS que venden por 99 dólares (74,89 euros), incorpora tamén conectividade Wi-Fi N de dobre banda (mellorando aínda máis a retransmisión sen fíos de contidos en alta definición), aparte de HDMI tamén ten saídas de vídeo por compoñentes e saídas ópticas de audio e incluso un porto USB para poder reproducir contidos de unidades de memoria, o que leva este streamer a converterse nun reprodutor multimedia (limitado a un reducido número de formatos: vídeo en MPEG-4, música en MP3 e fotografías en JPEG e PNG).
Externamente os 3 dispositivos son practicamente iguais e, aparte de acceder a vídeos e fotografías que teñamos no ordenador, tamén poden reproducir contidos en liña coma programas e películas de Amazon Video On Demand, vídeos en Vimeo ou fotografías en Flickr, achegando a Rede ao televisor dun xeito bastante cómodo e sinxelo.
Polo momento descoñécese se esta familia de reprodutores de contidos remotos comercializaranse directamente en España (xa que este fabricante tende a limitarse ao mercado norteamericano, e incluso vende directamente os seus produtos).

PUBLICIDADE