Rockstar podería deixar que un enfermo terminal xogue anticipadamente a GTA VI

Unha publicación en LinkedIn de Anthony Armstrong, desenvolvedor en Ubisoft Toronto, explicando que un familiar seu, enfermo de cancro desde hai anos, recibira un prognóstico devastador: apenas lle quedaban meses de vida. Gran seguidor da saga GTA, todo apuntaba a que non chegaría a ver o lanzamento da nova entrega da saga de Rockstar Games, polo que Armstrong fixo un chamamento público a contactos de Rockstar e Take-Two para tentar organizar unha sesión privada que lle permitise ao seu familiar probar o xogo antes do seu falecemento.
A petición, que incluía a disposición a asinar un acordo de confidencialidade, foi amplamente compartida e recibiu apoio de profesionais da industria, levando a que posteriormente Armstrong actualizase a publicación para anunciar que o director xeral de Take-Two se puxera en contacto con el e que estaban á espera dunha resposta de Rockstar. Finalmente, comunicou que recibiran “grandes novas”, sen poder ofrecer máis detalles, o que levou a moitos a interpretar que o estudio accedeu a cumprir o desexo do xogador.
O caso non sería un precedente illado. En 2018, Rockstar xa permitira que outro seareiro enfermo terminal xogase anticipadamente a Red Dead Redemption 2.