Rock Band 4 despídese das tendas dixitais esta fin de semana

O mítico Rock Band 4 será retirado das tendas dixitais de Xbox e PlayStation este domingo debido á caducidade das licenzas musicais, segundo confirmou Harmonix, desenvolvedora do xogo, coincidindo co décimo aniversario do título.
«O domingo 5 de outubro de 2025 Rock Band 4 cumpre 10 anos. Vaya viaxe foi», sinala o comunicado. «Con esta efeméride chega un gran cambio: as licenzas orixinais da banda sonora principal están a expirar. Por iso, o xogo será retirado das tendas dixitais de PlayStation e Xbox. Se xa o posúes, nada cambia: manterás o acceso completo e poderás descargar tanto o xogo como as cancións en calquera dispositivo novo e compatible. O mesmo ocorre co contido descargable (DLC): as cancións irán desaparecendo ao cumpriren dez anos, pero todo o que xa mercaras seguirá na túa biblioteca».
A partir do domingo non se poderán comprar nin o xogo nin os temas que se publicaron como DLC o mesmo día do lanzamento. As cancións herdadas das entregas anteriores de Rock Band non se verán afectadas polo momento, aínda que Harmonix confirmou que decidirá o seu futuro nos vindeiros meses.
O modelo de DLC da saga permitiu trasladar bibliotecas enteiras de cancións, incluídas as exportacións dos discos principais, ao longo de tres xeracións de consolas, acumulando milleiros de temas desde 2007. O último DLC chegou en xaneiro de 2024, poñendo fin a oito anos de lanzamentos semanais, e agora comeza un proceso de desaparición progresiva de todo este contido.