Redondela leva o dominio galego a todos os seus enderezos
mércores, 24 de maio do 2017
- O consistorio de Redondela nunha imaxe de José Antonio Gil para a Galipedia
O
Concello de Redondela, coincidindo coa celebración tripla dos días
pasados (a significativa coincidencia do Día das Letras Galegas, o
Día da Internet e o Día das Telecomunicacións), vén
de anunciar o cambio de todos os dominios dos seus correos
electrónicos municipais ao dominio galego .gal. Esta muda, que
tamén atinxiu ás páxinas de Internet do Concello (encabezadas por
Redondela.gal),
foi levada a cabo polo Goberno local para celebrar, como dixemos, a
edición 2017 da festividade do 17 de maio. Asemade, quíxose
visualizar con estes cambios a importancia de promover o uso da
lingua galega ao abeiro das novas tecnoloxías da información. A
iniciativa foi acordada polo propio alcalde Javier Bas,
en colaboración co departamento de Novas Tecnoloxías, dirixido por
Julio Mougán.
Segundo
fixo saber o rexedor, a aposta polo domino .gal non é unha medida
illada do Concello. De feito, dixo, o Goberno de Redondela tense
significado en repetidas ocasións a prol do afianzamento da nosa
lingua en “todos os eidos da administración”. E engadiu: “Xa a
páxina web deste Concello foi das primeiras institucións en cambio
a .gal despois da aprobación do dominio en 2014, e agora queremos
dar un paso máis cara á defensa da nosa lingua e decidimos
estendelo a todos os correos electrónicos da Administración local”.