Rascayú obtivo unha excelente acollida no Cartoon Forum de Toulouse
luns, 17 de setembro do 2012
A serie galega de animación para TV, Rascayú, acudiu a pasada semana á 23ª edición do Cartoon Forum
celebrado na localidade francesa de Toulouse, onde segundo os seus responsables “suscitou o interese de investidores,
broadcasters e produtores nacionais e internacionais”.
Rascayú, producido pola firma coruñesa Otiiplanet Group e con produción executiva de Abano Producións, foi o único proxecto galego presente neste foro europeo de series de animación para televisión, segundo din, “o meirande de Europa”, e ata alí viaxou
da man do Clúster Audiovisual Galego (CLAG) co apoio económico do IGAPE.
O equipo responsable de Rascayú en Toulouse, entre o que
se atopaba o confundador de Otiiplanet, Juan Nouche, e a directora xeral de
Abano, Chelo Loureiro, ían a Francia na procura de asinar acordos con
coprodutores e axentes de vendas internacionais, e segundo afirman, “amósanse encantados coa excelente acollida
que tivo a serie no evento”.
É non é para menos pois, segundo explica a directora
xeral de Abano, xa teñen tres posibles coprodutores en Luxemburgo, Holanda e Alemaña, aos que hai que engadirlle as firmas nacionais TVE e TV3, que amosaron
interese pola serie, e a empresa Telefónica, “con quen xa se iniciaron negociacións”, afirma Loureiro.
Asemade, varias distribuidoras internacionais de Francia
e o Reino Unido manifestaron o seu interese pola serie, aínda que finalmente “da distribución da serie encargarase a
compañía Finding for you”, declarou a responsable de Abano.
Rascayú viaxou a Toulouse xunto con outros seis proxectos máis
do ámbito estatal, o que confirma a animación española como unha das máis
importantes de Europa tan só por detrás de Francia e o Reino Unido.