R leva a súa rede de última xeración a Meaño
luns, 14 de xaneiro do 2019
A
fibra até o fogar da firma R
segue espallándose co novo, engadindo concellos á comunidade de
territorios con redes ultrarrápidas de Internet a través das
infraestruturas da operadora galega. Entre os concellos que veñen de
estrear estes equipamentos de FTTH (Fiber To The Home) está o
termo municipal de Meaño, en Pontevedra, logo
da adhesión recente de Cuntis, na mesma provincia, e tamén
de Ribadumia (xa co novo ano).
A
achega desta infraestrutura implica, entre outras cousas, a
dispoñibilidade de accesos de nova xeración (con servizos avanzados
de teléfono, Internet de alta velocidade con 350 Mbps simétricos e
televisión dixital multicanle de R) para 260 fogares e empresas dos
núcleos de Seixiños e Ponte Dena, no termo de Meaño.
Amais,
serán preto de 500 residencias particulares e negocios os que se
poidan conectar á rede do operador galego cando se completen todos
os traballos no municipio pontevedrés, uns traballos que, segundo
explica a compañía de cable, tentaron tirar o máximo proveito das
infraestruturas municipais previamente existentes na localidade
arousá.
O
fornecemento de fibra no devandito concello abéiranse ao Plan
PEBA-Avanza do Ministerio de Economía e Empresa, do que R foi
adxudicataria en 2016 para despregar FTTH (fibra até o edificio) nas
chamadas “zonas brancas”, é dicir, as que nunca dispuxeran de
accesos de alta velocidade até este momento.
Xunto
co da provincia de Pontevedra, o operador galego conseguiu tamén a
adxudicación doutros dous proxectos; un, para as provincias de Lugo
e Ourense e outro para a da Coruña. En total, os tres proxectos
supoñen un investimento de preto de 8 millóns de euros, dos que 4,3
son subvencionados polos fondos FEDER da Unión Europea, a través do
Programa de Extensión da Banda Larga de Nova Xeración (PEBA-Plan
Avanza) do Ministerio de Economía e Empresa. Só na provincia de
Pontevedra o investimento total rolda os 3,35 millóns de euros, dos
cales 1,84 proceden dos fondos europeos.
R
engadiu que cando se completen os traballos de despregue nas catro
provincias galegas, arredor de 33.000 fogares e empresas destas
“zonas brancas” formarán parte do millón longo de fogares e
negocios que a día de hoxe están en disposición de recibir os
servizos avanzados de R en Galicia.