Quetiempo.es permite consultar as predicións meteorolóxicas do INM sobre o mapa de España

martes, 11 de setembro do 2007 Marcus Fernández

Os mashups baseados en Google Maps son cada día máis habituais, pero un que será moi ben recibido polo público seguro que é Qué tiempo, que amosa a información meteorolóxica sobre o mapa peninsular e das illas españolas, de xeito que consultar a predición do tempo para os vindeiros 7 días nunca foi tan atractivo.
A nova web, de Nicenova Consulting, emprega a información do Instituto Nacional de Meteoroloxía para amosar o tempo que fai nas capitais de provincia españolas e en varias vilas próximas, presentando a condición meteorolóxica do día en curso (xunto coas temperaturas máxima e mínima) e permite ampliar coa información dos días sucesivos.
Neste momento podemos empregar o novo servizo para consultar as predicións meteorolóxicas de 1.000 localidades españolas, das que 80 son galegas, aínda que é de agardar que incorporen máis localidades segundo as vaian localizando no mapa.

PUBLICIDADE