Pulo aos investimentos en capital semente para os proxectos da aceleradora VíaVigo
venres, 14 de febreiro do 2014
O consello da sociedade
de capital risco Vigo Activo vén
de dar pulo aos investimentos para os proxectos seleccionados pola
aceleradora VíaVigo, proxectos todos eles directa ou
indirectamente ligados ás TIC, como veremos con máis detalle máis
abaixo. Así o vén de anunciar o Consorcio da Zona Franca, que é
quen promove VíaVigo
e cuxa delegada de Estado, Teresa Pedrosa, preside ademais o
devandito consello. Para axilizar o fluxo de capital semente, na
xuntanza do comité responsábel da sociedade Vigo Activo acordouse
que sexa o seu director xeral o que formalice os investimentos nos
proxectos de VíaVigo. “Con esta decisión”, informouse, “o
fluxo de capital semente de até 50.000 euros en cada unha das dez
empresas non terán que someterse de xeito individual a unha nova
aprobación polo consello”.
Lembrar que Vigo Activo
ten ás súas costas un total de fondos desembolsados de máis de 18
millóns de euros ao longo das súas dúas décadas de vida. A
sociedade, informan os seus responsábeis, “apoiou o medre de
moitas PEME galegas con fondos de capital risco e asesoramento”.
Porén, este ano é o ano definitivo da ampliación da súa
actividade financeira de cara á empresa innovadora (un exemplo disto
é o seu apoio a VíaVigo). Promovida e impulsada polo Consorcio da
Zona Franca, a sociedade Vigo Activo naceu en maio de 1993, “co
convencemento de que o capital risco era o instrumento idóneo para
fomentar a renovación do tecido industrial galego ao apostar por
persoas eficaces, con proxectos innovadores e sectores con
tecnoloxías emerxentes”. Agora afronta unha etapa decisiva co seu
impulso aos dez proxectos elixidos para esta primeira edición da
aceleradora VíaVigo. A través da sociedade de capital risco, o
consorcio daralles investimento e asesoramento na xestión e na
organización.
Lembrar que a primeira
convocatoria da aceleradora de empresas rexistrou 131 proxectos
inscritos dos que dez foron as ideas de negocio que finalmente se
seleccionaron para recibir unha achega de capital semente e pasar á
fase de aceleración. O abano resultante de actividades é ben amplo:
hai unha empresa de produtos probióticos, outra de aplicacións para
crear contos personalizados nas tablets, un programa para manter no
tempo clientes utilizando xogos para móbiles, deseños
personalizados e ecolóxicos de lámpadas de cartón, un sistema que
axuda ás adegas a mellorar a calidade dos seus viños, un recurso
para a medición e análise por vídeo de públicos de
establecementos comerciais, unha web de compravenda de roupa de
bebés, unha aplicación para optimizar actividades de comercio
electrónico arredor de produtos de segunda man, un novo concepto de
camisetas de luxo e, tamén, unha canle de TV personalizada e
interactivo para negocios de hostalaría e salas de espera.
Por certo que a semana
pasada, a delegada Teresa Pedrosa anunciou que nos vindeiros meses
realizarase a segunda convocatoria desta aceleradora de empresas.