Primux, Miniprice Express e Antali, novas incorporacións TIC á Tecnópole
martes, 22 de xaneiro do 2013
A
Tecnópole-Parque Tecnolóxico de Galicia segue
a medrar con novas incorporacións e servizos, cousa moi a ter en
conta nestes tempos que corren, onde se multiplican os informes que
desaconsellan calquera actividade empresarial nova. Con todo, tanto
dende Tecnópole como dende unha chea de experimentados centros e
complexos produtivos, aconsellan xusto o contrario: a creatividade e
a innovación empresarial. Así, segundo
informan fontes do complexo de San Cibrao das Viñas, o seu
Consello de Administración autorizou a instalación de sete empresas
na súa xuntanza deste martes 22 de xaneiro. Na
reunión, presidida por Manuel Varela, vicepresidente do Consello de
Administración e director da Axencia Galega de Innovación, fíxose
un percorrido por cada unha das incorporacións. Entre todas elas,
hai varias que nos tocan
moi de preto tematicamente.
Máis
polo miúdo, foi aprobada a
instalación do departamento de I+D+i da empresa Primux Trading, que
baixo a marca Primux Tech deseña, fabrica e vende –dende
Ourense– produtos de electrónica de consumo: tablets,
smartphones, ebooks, computadores,
cargadores, baterías, teclados, ratos, altofalantes e discos duros
externos. As
razóns de ter emprazado o seu departamento de desenvolvemento na
Tecnópole, fixeron saber os propios responsábeis da empresa, teñen
que ver coa
oferta de servizos de apoio á innovación que ofrece a devandita
entidade empresarial
e á proximidade con outras firmas
tecnolóxicas coas que poder colaborar.
Asemade,
comezará a súa andaina no parque tecnolóxico galego outra empresa
moi ligada ás cuestións que tratamos dende este medio. Falamos de
Miniprice Express, dedicada ao desenvolvemento e integración de
servizos de comercio electrónico. Arestora,
ocupa tamén un novo espazo no parque
para avanzar nos seus proxectos de I+D nos
eidos do comercio electrónico
social e móbil, a computación na nube e a realidade aumentada.
Neste intre,
informa
Tecnópole,
xestiona unha tenda en
liña
de produtos informáticos que ofrece “prezos
moi competitivos grazas ao deseño dunha ferramenta propia para
integrar stocks de toda Europa en tempo real”.
Con
todo, hai máis presenza TIC. Concretamente a que vén da man de
Antali Technologies,
empresa xestora do novo portal de moda www.tenestilo.com,
dotado de estilista virtual personalizado. Cómpre lembrar que deste
portal falamos hai ben pouco dende Código Cero, en boa medida
para informar da súa posta en marcha e das vantaxes que achega:
diríxese a facilitar asesoramento en imaxe, a nivel de vestiario e
demais, ao tempo que fornece produtos de téxtil vinculados a
primeiras marcas
A
maiores, comezará a súa
actividade na Tecnópole a empresa de nova creación Xiriax Pharma,
que ocupa un niño na incubadora para prestar servizos de
internacionalización de produtos farmacéuticos a laboratorios de
toda España. Súmanse,
tamén, Integriatech, unha
empresa en proceso de constitución que orientará a súa actividade
a desenvolver modelos de explotación de sistemas eléctricos
distribuídos; Paratermo Energía, especializada na intermediación
de proxectos e estudos relacionados coa arquitectura, o urbanismo e o
medio; e, finalmente, a empresa de prevención Asepeyo, que instala
unha oficina na Tecnópole con motivo dun acordo de colaboración con
Unipresalud para ofrecer servizos conxuntos.
Cos
cinco sentidos
Entre
outras cuestións
amosadas perante o Consello, a Tecnópole informou que
dará un paso máis no proxecto de promoción da innovación aberta
iniciado en outubro de 2012 baixo o nome 5
sentidos para innovar.
Así nolo explica:
“Logo da positiva
experiencia rexistrada co primeiro encontro, celebrado entre empresas
da Tecnópole o outubro pasado, o próximo 22 de febreiro o programa
ábrese a empresas de toda Galicia; nesta
ocasión, incorpórase como novidade a celebración dun showroom no
que as empresas de Tecnópole expoñerán os seus produtos
innovadores”.