Primeiras imaxes do novo xogo de Regreso al Futuro

Para celebrar o 25º aniversario da triloxía cinematográfica Regreso al Futuro, dende Telltale Games están a traballar nun videoxogo por capítulos que inicialmente sairá para PC e Mac pasa saltar logo á PS3 e ao iPad, do que por fin vemos as súas primeiras imaxes, e parece estar á altura do que podiamos agardar, achegando unha imaxe realmente carismática de Marty McFly e o doutor Brown, así coma o clásico DeLorean que empregaban nas películas para viaxar polo tempo.
Mike Stemmie, un dos deseñadores do xogo, declarou a IGN que «a historia do xogo é completamente nova, o xogo desenvólvese meses despois dos acontecementos da terceira película dende a perspectiva de Marty. Por suposto, esta é unha historia que implica viaxar no tempo, así que, ¿quen sabe onde vai rematar? Estamos traballando con Bob Gale para asegurar de que estamos entregando unha experiencia auténtica. Haberá numerosos elementos recoñecibles, por suposto, o centro da cidade de Hill Valley, a torre do reloxo, o DeLorean, o laboratorio de Doc, e algunhas cousas máis. E poderédelas ver dun xeito que nunca experimentariades antes».
Aínda que tanto Doc coma Marty protagonizarán esta nova aventura, o único personaxe controlable será Marty McFly, e no xogo tomará un papel relevante a recollida de obxectos e a solución de puzzles (incluso será posible a combinación de obxectos para dar lugar a novos trebellos).