Prime Video retransmitirá a NBA durante os vindeiros 11 anos

O verán pasado Amazon Prime Video anunciou un acordo para facerse cos dereitos da NBA durante 11 anos a partir da tempada 2025-26, sendo España un dos países incluídos dentro deste novo escenario de explotación da liga de baloncesto profesional máis importante a nivel mundial.
Agora, Prime Video está a dar conta deste acordo para España, onde se convertería na primeira emisión deportiva en directo da plataforma (os anteriores directos foran do programa Operación Triunfo).
Desde outubro, Prime Video ofrecerá 87 partidos da tempada regular da NBA, incluíndo os sete encontros das eliminatorias da Emirates NBA Cup, todos os partidos do torneo SoFi NBA Play-In de postemporada, un terzo dos partidos da primeira e segunda rolda dos playoffs, unha serie das Finais de Conferencia por tempada e as Finais da NBA en seis das once campañas cubertas polo contrato. Nos vindeiros meses anunciaranse os nomes das persoas encargadas de presentar as retransmisións en España.
Ademais, Prime Video intégrase como socio estratéxico global do NBA League Pass, o servizo de subscrición da NBA para ver partidos en directo e baixo demanda. Os usuarios de Prime Video poderán engadir esta subscrición para acceder a aínda máis contido da tempada regular e da postemporada, mediante unha cota mensual adicional.
O acordo abrangue tamén a WNBA, que se poderá seguir en España desde 2026. A plataforma retransmitirá en exclusiva 30 partidos por tempada da liga feminina, incluído o partido da Commissioner’s Cup presentado por Coinbase, unha serie da primeira rolda dos playoffs cada ano, sete semifinais e tres finais da WNBA ao longo dos once anos de duración do contrato.