Presentada no Campus de Pontevedra unha web con máis de 300 proxectos de tecnoloxía e moda
luns, 27 de marzo do 2017
O
grupo de investigación DX7, con base de operacións na Facultade de
Belas Artes do Campus de Pontevedra, vén de presentar un ambicioso
proxecto que centra o seu foco no fértil terreño onde se
interrelacionan e enriquecen mutuamente o deseño téxtil e a
creatividade tecnolóxica. Trátase da web Design
& Fashion Future Lab, unha base de datos que xunta nun
único acubillo, plenamente accesíbel, máis de 300 proxectos de
fusión entre tecnoloxías e moda. A páxina, posta en marcha ao
abeiro dunha iniciativa financiada polo Ministerio de Economía e
Competitividade, xorde coa arela de “mapear proxectos desenvolvidos
en diferentes países”. Trátase pois dun mapa do mundo que non
rexistra países, senón creatividade sen fronteiras.
A
web foi dada a coñecer este luns por Lola Dopico, investigadora
principal do grupo DX7, e Silvia García, decana da devandita
facultade. A cita celebrouse na Casa das Campás e alí fíxose
un repaso por algúns dos proxectos acubillados na base de datos,
algúns ligados a investigacións académicas e outros ao traballo de
deseñadores e firmas en eidos como os biotecidos, wearables ou
o desenvolvemento de elementos téxtiles interactivos.
Tamén
se deron a coñecer os dous obxectivos principais do proxecto. Por
unha banda, promover que os deseñadores e profesionais da moda
“empecen a utilizar ferramentas de carácter tecnolóxico e
achegalos ao territorio dos wearables, ao concepto de
tecnoloxía para vestir”, o que deu pé a “seminarios e
laboratorios dos que iremos vendo resultados en vindeiras
exposicións”. Polo que respecta ao segundo obxectivo, ten a súa
raizame no amplo abano de investigadores e profesionais que fixeron
posíbel o proxecto (especialistas en arte, en cultura dixital, en
deseño gráfico, en moda ou en didáctica das artes plásticas, aos
que cómpre sumar un amplo elenco de colaboradores: deseñadores,
artistas, artesáns e expertos) e na necesidade colectiva de “facer
revisión”, de crear unha fronte común e, ao mesmo tempo, de
amosar, visualizar e mapear o que fan os compañeiros de profesión a
nivel internacional.
Polo
que respecta a autores e iniciativas concretas rexistradas, hai
traballos impulsados por firmas como por exemplo Balenciaga, Louis
Vuitton, Chanel ou Prada, xunto con “experiencias moito máis
vencelladas á investigación académica”. Todo isto forma o miolo
dunha base de datos que, como explicou Dopico, complétase cun “mapa
visual, que nos permite facer unha cronoloxía das pezas”. Así, a
ferramenta posibilita coñecer tanto “proxectos pioneiros”, como
o traballo realizado pola deseñadora Diana Drew na década de 1960,
como a expansión que se produciu neste eido na década de 1990, “a
través de pezas que xa son históricas como as de Hussein Chalayan”,
até chegar a iniciativas que se desenvolven na actualidade.
Trátase así mesmo, como sinala Dopico, dun proxecto
vivo, que irá sumando novas entradas á base de datos. “De
momento, séguense cargando diariamente as investigacións que imos
atopando, este é un territorio que está en espallamento e polo
tanto a ferramenta vai seguir medrando, porque é necesario que así
sexa”, salientou a investigadora.