Portugal vota a favor da recepción das súas radios e televisións en Galicia
mércores, 13 de abril do 2011
A pasada semana, a
Assembleia da República de Portugal aprobou unha iniciativa do Bloco de
Esquerda a favor de recibir as televisións e radios portuguesas en Galicia;
unha iniciativa que partía do acordo acadado entre o BNG e o BE a comezos deste
ano, polo cal este último se comprometía a levar o devandito debate político a
Portugal.
Despois de tres
meses desde que o partido portugués e o galego se reuniran en Santiago de
Compostela, a iniciativa, promovida pola deputada Catarina Martins, fíxose chegar
á Assembleia e insta ao Goberno de Portugal “a que realice as xestións necesarias ante as institucións galegas e
ante o Goberno español para a promoción e recepción da RTP na Galiza”, “ como potenciadoras do espaço cultural comum
galaico-português”, afirman.
Durante a presentación da iniciativa, que podemos ver na
canle do BNG en YouTube, o deputado do partido nacionalista, Bieito
Lobeira, asegurou que isto “redundará na
relación de Galiza co mundo lusófono e axudará a normalizar o noso idioma e a reintegralo
no espazo común galego-portugués”.
Bieito Lobeira
lembrou, asemade, que “ao remate da
pasada lexislatura foi aprobada unha resolución defendida polo Bloque
Nacionalista Galego para posibilitar a recepción da Radio Televisión Galega en
Portugal e a RTP en Galiza”, porén, segundo engadiu, “despois de dous anos o actual goberno do PP non deu un só paso para
efectivizar esta posibilidade”.
Vídeo da rolda de prensa do BNG e do Bloco de Esquerdas