Pont Up Store mostra a gran vitalidade do noso emprendemento innovador
venres, 21 de setembro do 2018
Pontevedra
é estes días unha festa do emprendemento, a innovación e o talento
que todas e todos atesouramos. O motivo? Pois
a nova celebración da feira Pont Up Store, que comezou onte,
inaugurouse hoxe e chega mañá ao seu punto álxido, con
presentacións e actividades de todo tipo, todas elas co nexo común
de poñer o foco na gran valía do noso emprendemento, e enxalzando
especialmente o feminino. O encontro, impulsado pola Universidade de
Vigo, no marco do Campus Crea S2i, co Concello de Pontevedra como
patrocinador principal, ten o seu “centro de operacións” na
praza de España, onde locen enxeños 45 novas empresas, boa parte
delas relacionadas directamente co dixital. Este mediodía
inaugurouse o encontro, mostrando “a gran vitalidade do país”.
Son
palabras do profesor Pedro Figueroa, presidente do comité
organizador do evento que se complementa coa organización, entre a
xornada do xoves e este sábado, de máis de 40 actividades en
diferentes puntos da cidade.
“Esta
é unha iniciativa moi ben encamiñada co ADN da Universidade de
Vigo”, salientou o reitor, Manuel Reigosa, destacando a aposta
“pola integración da Universidade no tecido socioeconómico” e a
vontade da institución de “devolver á sociedade o que a sociedade
nos dá”. Nun acto inaugural que reuniu a representantes do
Concello, Consellería de Economía, Emprego e Industria da Xunta de
Galicia, Deputación de Pontevedra, AJE Pontevedra, Abanca e , e no
que participaron tamén o vicerreitor do campus, Jorge Soto; e as
vicerreitoras de Transferencia, Consuelo Pérez, e Captación de
Alumnado, Estudantes e Extensión Universitaria, Natalia Caparrini, o
alcalde de Pontevedra, Miguel Anxo Fernández Lores, puxo en valor “a
importancia da colaboración entre institucións á hora dar
visibilidade a pé de rúa á capacidade das empresas”.
Polo
que se refire ás empresas participantes, figuran propostas tan
destacábeis como Aliadogs (unha comunidade de coidadores de mascotas
e usuarios destes servizos impulsada polos egresados da EE de
Telecomunicación Diego Alonso e Rabi Ouallam e a alumna de CCSS e da
Comunicación Cora Diz), FreshySweet (unha júnior empresa integrada
por alumnado de CCSS e da Comunicación que se adican, dende esta
iniciativa, a “facer servizos de publicidade e traballar con outras
empresas de Pontevedra”), EXGA3D (que mostra a súa experiencia
empregando a impresión 3D para deseñar e personalizar alimentos que
“sorprenden e poden achegar solucións ao mundo da saúde”),
Muutech, (unha startup viguesa enfocada a desenvolver sistemas
de información que se empregan para facer seguimento dos procesos
máis complexos, sobre todo da industria do motor e de loxística de
distribución), Edilicia BIM (centrada na tecnoloxía BIM, unha
metodoloxía de traballo para xestionar datos e corrixir erros en
grandes infraestruturas e proxectos de edificación que xa se emprega
con éxito nos países nórdicos e anglosaxóns), Data Monitoring
(que desenvolve dispositivos e software para seguir en remoto
procesos industriais achegando as vantaxes da Industria 4.0, a
industria intelixente, a todos os sectores), Xtonebox (que recupera a
antiga tecnoloxía de válvulas para fabricar de xeito artesanal
equipos de audio de gran calidade), o Taller 7 MakerSpace (que
fabrica prototipos a medida empregando a tecnoloxía de impresión 3D
e pon o seu talle a disposición dos clientes para que materialicen
as súas ideas), WinboxApp (que propón unha plataforma para poñer
en contacto directo a compradores e vendedores sen intermediarios;
unha alternativa para aforrar buscas e para resolver anuncios de
venta empregando unha soa aplicación) ou Dronalia (que oferta un
amplo abano de solucións de dron con venta directa, cursos e
servizos para diferentes sectores e necesidades).
Máis
40 actividades en tres xornadas
O
Pont-Up Store arrincou este xoves cunha xornada previa na que se
inseriron accións como a xeira de traballo I´m Remarkable,
centrada en mostrar o papel da muller na empresa, que Google impartía
en España por primeira vez, tras converterse nun dos novos
colaboradores do encontro. Así mesmo, o xoves tamén se puxo en
marcha na Casa das Campás o Espazo Ecobas de Economía Social, que
acolle diferentes iniciativas sobre a creación de proxectos de
economía social e solidaria ou creación de emprego a través da
fórmula cooperativa. A sede da Vicerreitoría acubilla tamén unha
exposición dos materiais gráficos das cinco edicións dun evento
polo que pasaron nestes cinco anos 210 empresas, das que o 89%
continúan en activo, no que se organizaron 150 actividades, con
preto de 4000 asistentes e que acumulou tamén preto de 90.000
visitantes.
Por
outra banda, o xoves púxose en marcha outra das novidades desta
edición o Espazo Gaming, que dá cabida a diferentes obradoiros e
actividades ligadas ao sector dos videoxogos. Xunto a esta
iniciativa, o evento promove tamén, na Sala X da Facultade de Belas
Artes, un Fab-Lab centrado desta volta no uso da fabricación dixital
de instrumentos musicais. En total, máis de 40 actividades, entre
encontros, talleres, coloquios ou xuntanzas de diferentes entidades
vinculadas ao eido do emprendemento, integran o programa dun evento
que continúa na tarde do venres e na xornada do sábado con
iniciativas como o encontro Emprende con WordPress, que a Comunidade
WordPress de Pontevedra promove esta tarde en Belas Artes como
prólogo á WordCamp que celebran na Facultade de Ciencias Sociais e
da Comunicación; a carreira de empresas que este sábado promoven
AJE Pontevedra e Abanca, ou o encontro sobre mentoring en feminino
que promove a Asociación Española de Mentoring e Consultoría.