Plexus presenta un curso sobre aplicacións con tecnoloxía web con compromiso de contratación
xoves, 4 de abril do 2013
A compañía galega
Plexus,
en colaboración con Sanromán Consultoría e Formación, impartirá
un curso gratuíto de 270 horas de duración sobre desenvolvemento de
aplicacións con tecnoloxías web. A empresa tecnolóxica, con sede
en Santiago, anunciou este xoves que se compromete a contratar ao 30%
dos alumnos que finalicen a formación con asistencia superior ao 90%
das clases. Para comezar, todos os asistentes pasarán a formar parte
da bolsa de traballo da compañía. “O curso”, informa
Plexus, “diríxese a estudantes dos últimos cursos e mozos
desempregados menores de 30 anos con estudos de enxeñaría técnica
informática ou grao de informática”.
As persoas interesadas
poden matricularse online no
apartado de formación da web da empresa, até o día 15 de
abril, data na que finaliza o prazo de inscrición. A acción
formativa desenvolverase entre o 10 de xullo e o 27 de setembro, nas
instalacións compostelás da firma. Pola súa banda, o profesorado
encargado de impartir o curso será persoal propio de Plexus con
máis de 10 anos de experiencia no sector TIC, “unha traxectoria
profesional que garante que os coñecementos que os alumnos adquiran
estarán actualizados coas tecnoloxías máis empregadas”,
informa a compañía.
Plexus deseñou para este
curso unha programación eminentemente práctica e dividida en catro
módulos formativos co fin de “conseguir o máximo
aproveitamento por parte dos asistentes e favorecer, tamén, a
inserción laboral do alumnado”. O primeiro módulo será sobre
desenvolvemento J2EE; o segundo, sobre bases de datos MySQ, SQL
Server e Oracle; o terceiro, de desenvolvemento PHP e Drupal; e o
cuarto e último, sobre maquetación HTML5 e CSS. Os asistentes
alcanzarán coñecementos técnicos de tecnoloxía Java, J2EE,
STRUTS, SPRING e JSF para o posterior desenvolvemento profesional no
ámbito das novas tecnoloxías da información. A idea é que os
participantes aprendan tamén a xestionar e desenvolver aplicacións web
empregando a sintaxe da linguaxe PHP, a construír e xestionar
comunidades en Internet e a crear páxinas. O curso está
co-financiado pola Fundación Tripartita e o Servizo Público de
Emprego Estatal (SEPE).